نئی دہلی،21؍اگست (ایس او نیوز؍یو این آئی) کانگریس کی جنرل سکریٹری پرینکا گاندھی نے بدھ کے روز سابق مرکزی وزیر پی چدمبر کی حمایت کرتے ہوئے کہا کہ مرکزی حکومت کی ناکامیوں کو اجاگر کرنے کی وجہ سے انہیں ’شرم ناک‘ طریقہ سے شکار بنایا جا رہا ہے۔

آئی این ایکس میڈیا معاملہ میں دہلی ہائی کورٹ کی طرف سے منگل کے روز سابق مرکزی وزیر پی چدمبرم کی عرضی خارج ہونے کے اگلے دن پرینکا گاندھی نے چدمبرم کی حمایت میں ٹوئٹ کیا۔ چدمبرم کو ایک انتہائی قابل اور معزز رکن پارلیمان بتاتے ہوئے پرینکا گاندھی نے کہا، ’’پارٹی اپنے رہنما کے ساتھ کھڑی ہے اور ہم سچائی کی لڑائی کو جاری رکھیں گے، پھر چاہے جو نتیجہ ہو۔‘‘

پرینکا نے اپنے ٹوئٹ میں مزید لکھا، ’’وہ بر سر اقتدار حکومت پر بلا جھجک سچائی بیان کرتے ہیں اور حکومت کی ناکامیوں کو اجاگر کرتے ہیں لیکن یہ سچائی بزدلوں کو غیر آرام دہ بنا رہی ہے، اس لئے انہیں شرمناک طریقہ سے نشانہ بنایا جا رہا ہے۔

ادھر، راہل گاندھی نے پی چدمبرم کے خلاف سی بی آئی اور ای ڈی کی کارروائی کو قابل مذمت قرار دیا ہے۔ انھوں نے ٹوئٹ کر کے کہا ہے کہ ’’مودی حکومت ای ڈی، سی بی آئی اور میڈیا کے کچھ طبقات کا استعمال کر پی چدمبرم کی شبیہ کو خراب کرنے کی کوشش کر رہی ہے۔‘‘

واضح رہے کہ آئی این ایکس میڈیا معاملہ فارین انویسٹمنٹ پروموشن بورڈ (ایف آئی پی بی) میں مبینہ طور پر بے ضابطگیوں سے متعلق ہے۔ چدمبرم پر سال 2007 میں مرکزی وزیر خزانہ رہنے کے دوران تقریباً 300 کروڑ روپے کی رقم حاصل کر کے میڈیا گروپ کو ایف آئی پی بی منظوری دینے میں بے ضابطگی کرنے کا الزام ہے۔

سابق وزیر داخلہ اور وزیر خزانہ چدمبرم قومی سلامتی اور اقتصادیات کے مسئلہ پر مرکز کی مودی حکومت پر لگاتار نشانہ لگاتے رہے ہیں۔