نئی دہلی،10؍مئی (ایس او نیوز؍یواین آئی) سینئر کانگریسی لیڈر اور سابق مرکزی وزیر داخلہ پی چدمبرم نے مرکز اور مختلف ریاستی حکومتوں پر کانگریس کے انتباہ کو نظر انداز کئے جانے کا الزام عائد کرتے ہوئے ہفتہ کو کہا کہ مرکزی حکومت مہاراشٹر میں مہاجر مزدوروں کے مال گاڑی سے کٹ کر ہلاک ہونے کے واقعہ پر مگرمچھ کے آنسو بہا رہی ہے -

چدمبرم نے ٹویٹ کر کے کہاکہ کانگریس نے پہلے ہی لاک ڈاؤن کے دوران روزگار، پیسے اور اناج کے بحران کا سامنا کر رہے مہاجر مزدوروں کا مسئلہ اٹھایا تھا - کانگریس نے غریب کنبوں کو نقدی اور اناج دیے جانے کی مانگ بھی کی تھی، جس کا فائدہ مہاجر مزدوروں کو بھی ملتا-حکومتوں نے ہماری اپیل پر توجہ نہیں دی -

کانگریس نے ہی سب سے پہلے مطالبہ کیا تھا کہ اپنی آبائی ریاستوں کو واپس لوٹنے کے خواہاں مہاجر مزدوروں کے لئے انتظامات کئے جانے چاہئیں - مرکزی حکومت نے 38 دنوں تک اس جانب کوئی توجہ نہیں دی -

انہوں نے کہاکہ کانگریس نے پہلے ہی حقائق کی طرف توجہ مبذول کرائی تھی کہ ہزاروں کی تعداد میں مہاجر مزدور پیدل سفر کر کے اپنے گھروں کو واپس لوٹ رہے ہیں - ہماری بات کو نظر انداز کیا گیا - ابھی حکومتیں مہاجر مزدوروں کے مال گاڑی سے کٹ کر ہلاک ہونے کے واقعہ پر مگرمچھ کے آنسو بہا رہی ہیں - ایسے حادثے ہماری شاہراہوں اور ریلوے ٹریک پر سبھی کو روز دکھائی دیتے ہیں،سوائے حکومتوں کے -“