چندریان2-لینڈروکرم نہیں ٹوٹا اسروپرجوش-رابطہ کے امکانات روشن
بنگلورو،10؍ستمبر(ایس او نیوز؍ایجنسی) ہندوستانی خلائی ادارہ اِسرو نے لینڈر وکرم کا پتہ تو لگا لیا ہے لیکن اس سے رابطہ اب بھی قائم نہیں کیا جا سکا ہے۔ لینڈر وکرم سے رابطہ قائم کرنے کی کوششیں لگاتار جاری ہیں -وہیں چندریان-1کے ڈائرکٹر ایم- انا دورائی نے بتایا ہے کہ آخر کیوں رابطہ قائم کرنے میں اِسرو کو کامیابی نہیں مل رہی ہے۔ انا دورائی نے کہا کہ چاند کی سطح پر موجود رکاوٹیں لینڈر وکرم کو سگنل حاصل کرنے سے روک رہی ہیں -ڈائرکٹر نے نیوز ایجنسی اے این آئی کو بتایا کہ ہم نے لینڈر کا چاند کی سطح پر پتہ لگا لیا ہے، اب ہمیں اس کے ساتھ رابطہ قائم کرنا ہوگا۔ جس جگہ لینڈر اترا ہے، وہ سافٹ لینڈنگ کیلئے مناسب نہیں ہے-ساتھ ہی انا دورائی نے کہا کہ پہلے چندریان کے آربیٹر نے رابطہ قائم کرنے کیلئے لینڈر کی طرف سگنل بھیجے، لیکن موجودہ حال میں یہ دیکھنا ہوگا کہ وہ سگنل پکڑ پاتا ہے یا نہیں۔آربیٹر اور لینڈر کے درمیان ہمیشہ دو طرفہ مواصلات ہوتی ہے، لیکن ہم ایک طرفہ ڈائیلاگ کرنے کی کوشش کر سکتے ہیں - حالانکہ انہوں نے کہا کہ رابطہ5 سے 10منٹ سے زیادہ کیلئے نہیں ہوگا۔ اس کے علاوہ انھوں نے کہا کہ یہ ایک مشکل حالت ہے لیکن ہمارے سائنسداں اسے سنبھالنے میں کافی اہل ہیں -دوسری جانب حالانکہ وقت نکلنے کے ساتھ ساتھ چندریان-2کے لینڈر وکرم سے رابطہ بحال ہونے کا امکان بھی کم ہوتا جا رہا ہے- لیکن، اِسرو لینڈر وکرم سے رابطہ کرنے کی ہر ممکن کوشش کر رہا ہے۔ اِسرو سربراہ کے. سیون نے کہا کہ خلائی ایجنسی 14 دنوں تک لینڈر سے رابطہ قائم کرنے کی کوشش کرے گی۔ چندریان-2 میں لگے کیمروں سے چاند کی سطح پر لینڈر وکرم کا پتہ اتوار کو چلنے کے بعد انہوں نے دہرایا کہ یہ (رابطہ بحال کرنے کی) کوششیں جاری رہیں گی-مہم سے جڑے ایک سینئر افسر نے کہا کہ جیسے جیسے وقت گزرتا جائے گایہ رابطہ بحال کرنا مشکل ہوگا-ایک افسر نے کہا کہ حالانکہ صحیح ماحول ملنے پر یہ اب بھی توانائی پیدا کر سکتا ہے اور سولار پینل کے ذریعہ بیٹریوں کو ری چارج کر سکتا ہے-