نئی دہلی،9؍مئی(ایس او نیوز؍یواین آئی) کانگریس کے سابق صدر راہل گاندھی نے کورونا وائرس کی وبا کو ایک شدید چیلنج بتاتے ہوئے کہا ہے کہ مرکزی حکومت اکیلے اس سے نہیں لڑ سکتی اس لئے اسے ریاستی حکومتوں کو ساتھ لے کر شفافیت کے ساتھ اس کا سامنا کرنا چاہئے اور حکمت عملی بناتے ہوئے لاک ڈاؤن کھولنا چاہئے -
راہل گاندھی نے جمعہ کو یہاں ویڈیو کانفرنسنگ کے ذریعہ پریس کانفرنس سے خطاب کرتے ہوئے کہا کہ کورونا وائرس سے آج ملک میں جو حالت ہے اس پر قابو پانے کے لئے اور آگے نکل کر کام کرنے کی ضرورت ہے -یہ کام مرکزی حکومت اکیلے نہیں کرسکتی بلکہ اس کے لئے ریاستوں کو ساتھ لے کر چلنا چاہئے -کئی ریاستوں کے وزرائے اعلیٰ اور کئی ضلعوں کے ڈسٹرکٹ مجسٹریٹ ان حالات سے اور بہتر طریقے سے نمٹ سکتے ہیں اس لئے مرکزی حکومت کو کورونا کے خلاف لڑائی کو ضلع سطح تک لے جانے کی ضرورت ہے -انہوں نے کہا کہ مرکز کو وزرائے اعلی اور ڈسٹرکٹ مجسٹریٹوں پر بھروسہ کرکے ہی لڑائی کو لڑنا ہے -ایک دوسرے پر بھروسہ نہیں ہوگا تو بہت بڑا مسئلہ پیدا ہوگا اس لئے کام میں شفافیت اپناتے ہوئے کورونا کے خلاف ضلع سطح پر لڑنے کی ضرورت ہے -