نئی دہلی،3؍جولائی (ایس او نیوز؍یو این آئی) مرکزی حکومت نے پنجاب نیشنل بینک سے کروڑ وں روپے کی جعل سازی کرنے والے مفرور اصل ملزم میہول چوکسی کی صحت سے متعلق رپورٹ پر بمبئی ہائی کورٹ کے فیصلے کے خلاف سپریم کورٹ کا دروازہ کھٹکھٹایا ہے -سالسٹر جنرل تشار مہتا نے اس عرضی پر تین جولائی کو سماعت کرنے کی درخواست کی ہے -ہائی کورٹ نے گذشتہ24جون کو میہول چوکسی کی موجودہ طبی صورت حال پر رپورٹ دینے کے لئے ماہرین کی ایک ٹیم تشکیل دی تھی- اس رپورٹ کو دیکھنے کے بعد عدالت یہ فیصلہ کرے گی کہ چوکسی ہوائی سفر کے لئے فٹ ہیں یا نہیں -ہائی کورٹ نے ماہرین کی ٹیم کو 9جولائی تک رپورٹ داخل کرنے کا حکم دیا ہے - اس کے اگلے دن یعنی 10 جولائی کو ہائی کورٹ میں سماعت ہوگی-خیال رہے کہ چوکسی نے اپنی صحت کا حوالہ دیتے ہوے معاملے کی جانچ میں شامل ہونے کے لئے ہندوستان آنے سے انکار کردیا ہے - گذشتہ دنوں ایک حلف نامہ میں چوکسی نے کہا تھا کہ وہ ملک سے بھاگا نہیں ہے بلکہ اپنا علاج کرانے کے لئے بیرون ملک میں ہے - اس نے یہ بھی لکھا ہے کہ وہ جانچ میں شامل ہونے کا خواہش مند ہے لیکن صحت سے متعلق وجوہات کی بنا پر سفر کرنے سے معذور ہے -