مرکزی حکومت سڑک حادثوں پرکنٹرول کے لیے تمل ناڈو ماڈل اپنائے گی: نتن گڈکری
نئی دہلی،22/جولائی (ایس او نیوز/ آئی این ایس انڈیا) مرکزی حکومت ملک میں بڑھتے ہوئے سڑک حادثوں پر کنٹرو ل کے لیے تمل ناڈو ماڈل اپنائے گی۔ وزیرٹرانسپورٹ و ہائی وے نتن گڈکری نے پیر کو راجیہ سبھا میں سوال کے دوران بتایا کہ تامل ناڈو واحد ریاست ہے جہاں سڑک حادثات میں کمی آئی ہے۔تمل ناڈو کے ماڈل کو ملک بھر میں نافذ کیا جائے گا۔گڈکری نے بتایا کہ 2018 میں ملک میں سڑک حادثوں میں مرنے والوں کی تعداد 1.88 لاکھ تھی۔انہوں نے بتایا کہ قومی شاہراہوں پر سڑک حادثوں میں کمی ضرور آئی ہے اور سڑک حادثات پر کنٹرول کیلئے حکومت موثر اقدامات کررہی ہے۔انہوں نے بتایا کہ اتر پردیش میں گزشتہ سال سڑک حادثات میں اموات میں 17 فیصد اضافہ ہوا ہے، تامل ناڈو ملک کی واحد ریاست ہے جہاں سڑک حادثات کم ہوئے ہیں۔اسی طرح حکومت پورے ملک میں تامل ناڈو ماڈل نافذ کرنے کی کوشش کر رہی ہے۔گڈکری نے بتایا کہ ملک میں تمام ریاستی اور قومی سطح کے تمام ہائی ویز پر زیادہ حادثات والے مقامات کی شناخت کے لئے منصوبہ بنایا گیا ہے۔انہوں نے بتایا کہ اس منصوبے کی تجویز کو عالمی بینک کے سامنے پیش کیا گیا ہے۔اس میں سات ہزار کروڑ روپے ایشیائی ترقیاتی بینک اور سات ہزار کروڑ روپے عالمی بینک سے ملیں گے۔اس منصوبے کے تحت بلیک سپاٹ کی شناخت کرکے ان جگہوں کو سڑک حادثوں کے خطرے سے آزاد کیا جائے گا۔