وندے بھارت مشن کے تحت مزید 6ممالک کے بھارتی لوٹیں گے وطن : پرائیویٹ ہوائی جہازوں کے استعمال کا فیصلہ
نئی دہلی :یکم جون (ایس اؤ نیوز) کووڈ لاک ڈاؤن کی وجہ سے گزشتہ دو مہینوں سے مختلف بیرونی ممالک میں پھنسے ہوئے بھارتیوں کے لئے بڑی بری خبر یہ ہے کہ فی الحال بین الاقوامی ہوائی جہاز کی خدمات شروع نہیں کی گئی ہے۔
ذرائع سے ملی جانکاری کے مطابق 30جون کی دیر رات تک بین الاقوامی ہوائی جہازوں کی آمدو رفت پرپابندی عائد کرتےہوئے سنیچر کی رات شہری ہوائی جہاز ڈائرکٹوریٹ (ڈی جی سی اے )نے فرمان جاری کیا ہے۔ لاک ڈاؤن 5.0کے متعلق مرکزی وزارت داخلہ کی طرف سے ہدایات جاری ہوتے ہی ڈی جی سی اے نے بین الاقوامی ہوائی جہازوں پر پابندی عائد کرنے کا اعلان کیا ہے۔ڈی جی سی اے نے کہا ہے کہ بیرونی ہوائی جہاز کمپنیوں کو بھارت آنے اور ملک سے باہر جانے والی سبھی ہوائی جہاز کی خدمات کے متعلق آئندہ دنوں میں جانکاری مہیا کی جائے گی۔
وزارت خارجہ کے ترجمان انوراگ شری واستو نے جانکاری دیتے ہوئے بتایا کہ ائیر لفٹ’وندے بھارت‘ کے ذریعے ابھی تک 45،000 بھارتی ملک لوٹ چکے ہیں۔ بیرونی ممالک میں پھنسے ہوئے بھارتیوں کی مدد کے لئے مرکزی حکومت نے 7اور16مئی کو دو مرحلوں میں بڑے پیمانے پر ائیر لفٹ شروع کیاتھا۔ جس میں 8069مہاجر مزدور، 7656طلبا،5107روزگار بھارت لوٹے ہیں۔ بھارت لوٹنے کے لئے کل 3،08،200 بھارتیوں نے اپنے ناموں کا رجسٹریشن کیاتھا۔
ابھی تک 429 ائیر انڈیا کے ہوائی جہاز60ممالک میں اپنی اڑانیں بھری ہیں ۔ بھارت لوٹنے والوں کی تعداد میں اضافہ کو دیکھتے ہوئے مرکزی حکومت نے پرائیویٹ ہوائی جہازوں کو استعمال کرنے کا فیصلہ لیا ہے۔ بتایا گیا ہے کہ 4جون سے 6جون کے درمیان مزید 6 ممالک کو وندے بھارت کے ہوائی جہاز اپنی اڑانیں بھریں گی۔