مرکزی حکومت کا دیوالیہ نکل گیا ہے: وزیراعلیٰ کما رسوامی
بنگلورو،21؍اپریل(ایس او نیوز) ریاستی حکومت کو نا اہل اور کمزور سرکار کے وزیراعظم کے بیان پر شدید برہمی ظاہر کرتے ہوئے وزیراعلیٰ کما رسوامی نے کہا کہ مرکزی حکومت دیوالیہ سرکار ہے ، نریگا اسکیم کے تحت ریاست کو 13ہزار کروڑ روپئے واجب الادا ہیں ۔ یہ رقم جاری نہ کرنے والی مودی حکومت دیوالیہ ہوگئی ہے۔ کسانوں کے کاشتکاری قرضوں کی معافی اسکیم کا مودی مذاق اڑا رہے ہیں ۔ لیکن کسان اسکیم کے تحت ریاستی کسانوں کومرکزی حکومت نے مالی امداد نہیں کی ۔مودی الزام لگاتے ہیں کہ ریاستی حکومت نے متاثرہ کسانوں کی فہرست مرکز کونہیں بھیجی۔ ویب سائٹ میں چیک کریں تو پتہ چلے گا کہ فہرست روانہ کی گئی ہے یا نہیں۔میں خوامخواہ الزام نہیں لگاتا۔انہوں نے کہا کہ مودی اب جل نیتی ( آبی منصوبہ) سے متعلق بات کررہے ہیں ۔ گزشتہ 5برسوں کے دوران ان کی حکومت تھی انہوں نے آخر کیا کیا۔ریاستی مخلوط حکومت لوک سبھا انتخابات کے بعد گرجائے گی ۔ ریاستی بی جے پی قائدین بارہا مہلت دے چکے ہیں اور اب وزیراعظم بھی بولنے لگے ہیں کہ 23مئی کے بعدمخلوط حکومت گرجائے گی ۔ وزیر اعظم الزام عائد کررہے ہیں کہ شمالی کرناٹک کودھوکہ دیا گیا ہے ۔ جبکہ میرے دور اقتدار میں اس علاقہ کی ترقیات کے لئے اضافی رقم جاری کی گئی ہے۔ صرف دھارواڑ ضلع کے کسانوں کے قرضہ معاف کرنے کیلئے 250کروڑ روپئے جاری کئے گئے ہیں۔