منگلورو،26؍اگست(ایس او نیوز)  منگلورو پولیس کمشنر پی ایس ہرشا نے آج اس بات کا انکشاف کیا ہے کہ کیفے کافی ڈے کے مالک وی جی سدھارتھ کی مو ت کی فارنسک رپورٹ آگئی ہے جس میں انکشاف ہوا ہے کہ انہوں نے خودکشی کی تھی۔ پولیس ذرائع نے بتایا کہ فارنسک رپورٹس کے مطابق سدھارتھ کے پھیپھڑوں میں پانی پایاگیااور ان کی موت ڈوبنے کی وجہ سے ہوئی ہے۔ واضح رہے کہ سدھارتھ 29جولائی سے منگلورو کے نتراوتی ندی سے لاپتہ ہوگئے تھے ۔

بعد ازاں ان کی نعش پانی سے برآمد ہوئی۔ انہوں نے 29جولائی کو اپنے افراد خاندان سے یہ کہہ کرگھر سے نکلے تھے کہ وہ ساکیلاشپورہ میں واقع دفتر جارہے ہیں۔ بعد ازاں وہ  کار پر سوار ہوکر اپنے ڈرائیورکو منگلورو چلنے کی ہدایت کی۔ جیسے ہی ان کی کار نتراوتی ندی کے قریب پہنچی،  انہوں نے ڈرائیور سے گاڑی روکنے کے لئے کہا او روہ گاڑی سے باہر آگئے اوراپنے ڈرائیور سے کہا کہ وہ یہاں کچھ دیر انتظار کریں میں کچھ دیر اکیلے پیدل چلنا چاہتا ہوں۔ بارش کے وقت بغیر چھتری کے وہ چلنے لگے۔ جس کے بعد وہ لاپتہ ہوگئے۔

دو دن بعد ان کی نعش ندی سے برآمد ہوئی۔ پولیس نے اُسی وقت  دعوی کیا تھا کہ انہوں نے خودکشی کی ہے۔ اور آج فارنسک رپورٹ موصول ہونے کے بعد  پولیس کادعوی سچ ثابت ہوا۔