آئی ایم اے کیس میں سابق وزیر روشن بیگ گرفتار، سی بی آئی کی طرف سے پوچھ گچھ کے بعد 14دن تک عدالتی حراست، جیل منتقل
بنگلورو،23؍نومبر(ایس او نیوز) کروڑوں روپے کے آئی ایم اے کیس کے سلسلہ میں اتوار کے روز سی بی آئی نے سابق ریاستی وزیر روشن بیگ کو گرفتار کر لیا اور انہیں 14دنوں تک عدالتی تحویل میں دے کر پرپنا اگرہارا جیل بھیج دیا گیا۔ اس کیس کے سلسلہ میں جانچ کو آگے بڑھاتے ہوئے سی بی آئی نے صبح 11بجے انہیں شہر کے گنگا نگر میں واقع سی بی آئی دفتر طلب کیا اور اس معاملہ میں ان کے شامل ہونے کے شبہ میں دیر شام تک ان سے پوچھ گچھ کی، جس کے بعد انہیں مرکزی ایجنسی نے گرفتار کرنے کا فیصلہ کیا۔ انہیں کورمنگلامیں خصوصی سی بی آئی عدالت کے سامنے پیش کیا گیا، جہاں انہیں 14دنوں تک عدالتی حراست میں بھیجنے کا فیصلہ سنایا گیا۔ سی بی آئی نے شبہ ظاہر کیا ہے کہ روشن بیگ نے آئی ایم اے کے سربراہ منصور خان سے رقم لی ہے۔ اس سلسلہ میں سی بی آئی کا دعویٰ ہے کہ سی بی آئی نے فورنسک آڈٹ کروائی ہے،جس کے بعدایجنسی کو یہ شبہ ہے کہ روشن بیگ کو رقم ادا کی گئی ہے۔یہ بھی سامنے آیا ہے کہ سی بی آئی نے آئی ایم اے کے سربراہ منصور خان کوجو فی الوقت پرپنا اگراہارا جیل میں ہیں تین دن قبل اپنی تحویل میں لیا اور ان سے دو دن پوچھ گچھ کے بعد اتوار کو روشن بیگ کو گرفتار کرلیا-