گائیں چوری کرنے کے الزام میں بیندور پولیس نے کیا ایک شخص کو گرفتار
بیندور13/جولائی (ایس او نیوز) پچھلے چند دنوں قبل بیندور پولیس اسٹیشن میں ہوئی گایوں کی چوری کے دومعاملات مبینہ ملزم کو پولیس نے گرفتار کرلیا ہے، جس کا نام عظیم بتایاگیا ہے جوکہ کنداپور گولی انگڈی کارہنے والا ہے۔
یاد رہے کہ کچھ دن پہلے بیندور کے دو گھروں میں آدھی رات کو گائیں چوری کیے جانے کے واقعات پیش آئے تھے۔ جس کے بعد جانوروں کی چوری کے بڑھتے ہوئے واقعات کے خلاف یہاں پر احتجاجی مظاہرہ کرتے ہوئے چوروں کی گرفتاری اور ان واقعات کے روک تھام کا مطالبہ کیا گیا تھا۔اس کے علاوہ ودھان پریشد میں حزب اختلاف کے سابق لیڈر کوٹا سرینواس پجاری اور سابق ایم ایل اے گوپالا پجاری نے بھی متاثرہ خاندانوں سے ملاقاتیں کی تھیں، اور پولیس سے سخت قانونی کارروائی کرنے کی مانگ کی تھی۔
پولیس کے بیان کے مطابق بیندور پولیس سب انسپکٹر تھمیش بی این نے اس معاملے کو سنجیدگی سے لیتے ہوئے اس کی تفتیش جاری رکھی اور پھر کنڈلور کے ایک اخباری نمائندے سے پولیس کو خبر ملی کہ کنڈلور میں ندیم نا می شخص کے گھر پر چوری کی گئی تین گائیں بندھی ہوئی ہیں۔اس خبر پر کارروائی کرتے ہوئے پولیس نے دھاوا بول کرمذکورہ شخص کے مکان سے تینوں گائیں بر آمد کیں۔ اب پولیس ایک ملزم کی گرفتاری کے بعد دیگر ملزمان کوتلاش کررہی ہے۔چھاپہ ماری اور چوری کی گئی گائیں برآمد کرنے کی یہ کارروائی اڈپی کی ایس پی نیشا جیمز کی رہنمائی میں بیندور پی ایس آئی تھمیش بی این اور ان کے عملے نے انجام دی۔