بنگلورو، 28؍اکتوبر (ایس او نیوز)  بنگلورو میں AY.4.2کووڈ۔19 کے تین معاملات سمیت ریاست میں 7 معاملات دریافت ہوئے ہیں، غیر ممالک میں ڈیلٹا AY.4.2 کووڈ وائرس کی نئی قسم تیزی سے پھیل رہی ہے۔ اس نئی قسم کے وائرس سے کرناٹک میں بھی 7 افراد متاثر پاگئے ہیں، جن میں 3 افراد کا تعلق بنگلورو سے ہے، محکمہ صحت و خاندانی بہبود کے کمشنر ڈی رندیپ نے یہ اطلاع دی ہے۔ 

انہوں نے کہا کہ ریاست میں کووڈ۔ 19 معاملات  زیر قابو ہیں۔ حکومت نے غیر ممالک سے آنے والوں کیلئے یہ شرط رکھی ہے کہ ان کو ریاست میں ہوائی جہاز سے اترنے کے بعد آر ٹی پی سی  آر ٹسٹ رپورٹ پیش کرنی ہوگی ، جو ان کی آمد سے 72 گھنٹے پہلے لی گئی ہو۔ اس رپورٹ کو ان کی طرف سے پہلے ہی ایئر سویدھا پورٹل  پر اپلوڈ کرنا ہوگا۔ اس کے علاوہ کوارنٹائن یا دیگر پابندیاں نہیں ہیں۔ انہوں نے کہا کہ ریاستی اور مرکزی حکومت کووڈ۔ 19 کی اس نئی قسم کا پھیلاؤ روکنے کیلئے اقدامات کرے گی۔ یہ وائرس پہلے ہی غیر ممالک میں پھیل چکا ہے، تاہم ابھی تک اس وائرس سے کسی کی موت ہونے کی خبر نہیں ہے، تا ہم ایک یا دو افراد کو علاج کیلئے اسپتال میں داخل  کیا گیا ہے۔ 

دوسری طرف ریاست میں کورونا پازیٹیو معاملات کی تعداد قابل لحاظ حد تک کم ہونے لگی ہے۔ پچھلے 24 گھنٹے  میں 277 پازیٹیو معاملات رونما ہوئے ، 7 افراد ہلاک ہوئے ،  محکمہ صحت و خاندانی بہبود نے مزید بتایا کہ باگل کوٹ ، بیدر، چامراج نگر، داونگرے، دھارواڑ ، گدگ، ہاویری، کلبرگی ، کولار ، کوپل، رائچور ، وجئے پور اور یادگیر میں کوئی بھی پازیٹیو معاملات رونما نہیں ہوا۔ 

 دوسری طرف بیلاری ، بیلگاوی ، بنگلور دیہی ، چکبالا پور، چکمگلورو ، چترادرگہ، کورگ، منڈیا ، رام نگرم ، شیموگہ، ٹمکورو ، اُڈپی اور اتر کنڑا میں 10 سے کم پازیٹو معاملات رونما ہوئے ، بنگلورو میں 169، دکشن کنڑا 23، ہاسن 18، میسورو 19 سمیت ریاست بھر میں پچھلے 24 گھنٹوں میں 277 پازیٹیو معاملات رونما ہوئے، کل متاثرین کی تعداد 29،86،553 ہوگئی ۔ 343 مریض صحت یاب ہو کر اسپتالوں سے رخصت ہوئے ، صحت یاب ہونے والوں کی کل تعداد 29،39،990 ہوگئی۔ اب بھی ریاست میں 8،510 مریض زیر علاج ہیں۔ بنگلورو دیہی اور کولار میں فی کس 2 افراد ہلاک ہوئے ، بنگلورو شہر میں 3 ، ہاسن 2 سمیت کل 7 افراد ہلاک ہوئے ، کل مہلوکین کی تعداد 38،024 ہوگئی ۔