منڈیا میں المناک حادثہ؛ کار بجلی کےکھمبے سے ٹکراگئی؛ بچانے کے لئے آگے بڑھنے والے تین لوگوں کی موقع پر موت
منڈیا 13/جون (ایس او نیوز) ریاست کرناٹک کے منڈیا میں بدھ کی شب کو ہوئے ایک المناک حادثے میں زخمیوں کوبچانے کے لئے آگے بڑھنے والے ہی تین لوگوں کی موت واقع ہونے کی واردت پیش آئی ہے۔
ذرائع سے ملی اطلاع کے مطابق منڈیا کے بھارتی نگر کے قریب منی گیرے میں بدھ کی شب کو ایک تیز رفتار کار ڈرائیور کے ہاتھوں بے قابو ہوکر ایک بجلی کے کھمبے سے ٹکراگئی، ٹکر لگتے ہی کھمبا ٹوٹ گیا اور اس کا ایک حصہ نیچے گر پڑا۔
کار پر سوار لوگ حادثے میں شدید زخمی ہوئے تھے، اور وہ مدد کے لئے لوگوں کو پکار رہے تھے، ایسے میں زخمیوں کو بچانے کے لئے جیسے ہی کچھ لوگ آگے بڑھے، انہوں نے یہ جانے بغیر کہ ، کار کے قریب نیچے پڑے ہوئے کھمبے کے ٹکڑے کے ساتھ بجلی کا تار بھی نیچے گرا ہوا ہے، اُس پر ان لوگوں نے غالباً اپنے قدم رکھ دئے، جس کے نتیجے میں تین لوگوں کی الیکٹرک شاک لگنے سے موقع پر ہی موت واقع ہوگئی ۔ مرنے والوں کی شناخت منی گیرے قصبہ کے رہنے والے دیوراجو (31)، بیدر ہوسہلّی قصبہ کے رہنے والے پرسنّا (45) اور پردیپ (25) کی حیثیت سے کی گئی ہے۔
اطلاع کے مطابق کار ملولّی سے بھارتی نگر کی طرف جارہی تھی، بدھ کی شب کو یہ حادثہ پیش آیا۔ موقع پر موجود لوگوں نے تین لوگوں کو بجلی کا شاک لگتے دیکھ کر فوراً محکمہ الیکٹری سٹی کو خبر کرتے ہوئے الیکٹرک سپلائی بندکرائی، پھر کار پر موجود زخمیوں کو کار سے نکال کر مقامی اسپتال پہنچایا۔
بھارتی نگر پولس اہلکاروں نے جائے وقوع پر پہنچ کر جائزہ لیا ہے ، ضروری کاروائی جاری ہے۔