سعودی عربیہ کے طائف میں کار حادثہ کا شکارایک نوجوان جاں بحق، دوسرا شدید زخمی
بھٹکل 23 ستمبر (ایس او نیوز) بیندور کے قریب گولی ہولے کا ایک نوجوان سعودی عربیہ کے طائف میں ہوئے سڑک حادثہ میں جاں بحق ہوگیا جس کی شناخت محمد افتخار مٹّا (33) کی حیثیت سے کی گئی ہے۔ حادثے میں گنگولی کا رہنے والا ایک شخص جس کی شناخت مالی سرفراز (43) کی حیثیت سے کی گئی ہے شدید زخمی ہوا ہے جسے طائف کے کنگ عبدالعزیز اسپتال میں داخل کیا گیا ہے۔
طائف سے نورالامین گنگولی نے فون پر معلومات فراہم کرتے ہوئے بتایا کہ افتخار اور سرفراز کار پرسوار ریاض سے جدہ جانے کے لئے نکلے تھے، طائف میں اپنے دوست سے ملاقات کی پھر جدہ کے لئے سفرجاری رکھا، اس دوران دونوں نے تھکان کو دور کرنے کے لئے اپنی کار کو شفا روڈ کنارے پارک کی اور تھوڑی دیر آرام کرنے کے بعد آج بدھ صبح قریب 10:30 بجے کار اسٹارٹ کرکے آگے بڑھے ہی تھے کہ اچانک پیچھے سے ایک تیز رفتار کار ان کی کار سے ٹکراگئی۔ بتایا گیا ہے کہ کار کو سرفراز ڈرائیونگ کررہے تھے ، ٹکر لگتے ہی کار پوری طرح گھوم گئی جس سے افتخار کو شدید چوٹ لگی اور وہ موقع پر ہی جاں بحق ہوگئے۔ حادثے میں گنگولی کے سرفراز کو بھی شدید چوٹیں آئی ہیں، ان کی کمرکو شدید چوٹ لگی ہے اورانہیں آپریشن کے لئے لے جایاگیا ہے، ان کے سر کے ساتھ ساتھ ہاتھ اور پیر کو بھی چوٹ لگی ہے ۔اللہ ان کے آپریشن کو کامیاب بنائے۔
پتہ چلا ہے کہ حادثے کی اطلاع ملتے ہی ریاض سے افتخار کے بھائی اور دیگر ان کے رشتہ دار طائف کے لئے روانہ ہوگئے ہیں۔ افتخار کی میت کنگ عبدالعزیز اسپتال میں ہی رکھی گئی ہے، کاٖغذی کاروائیوں کے بعد میت ان کے بھائی اور دیگر رشتہ داروں کے حوالے کی جائے گی۔
ذرائع سے ملی اطلاع کے مطابق گذشتہ دس سالوں سے افتخار سعودی عربیہ کے دارلحکومت ریاض میں کسی ٹراویل کنسلٹنسی میں ملازمت کرتے تھے، شادی شدہ افتخار کو دو چھوٹے چھوٹے بچے ہیں۔ اللہ افتخار صاحب کی مغفرت فرمائے، پسماندگان کو صبر جمیل عطا فرمائے۔اور زخمی سرفراز کو جلد سے جلد صحت یاب فرمائے۔ اٰمین
بتایا گیا ہے کہ مرحوم افتخار گولی ہولے میں خدمہ فاونڈیشن کے رکن ہونے کےساتھ ساتھ کئی دیگر سماجی اداروں سے بھی جُڑے ہوئے تھے، سماجی کاموں میں بڑھ چڑھ کر حصہ لیتے تھے۔ اسی طرح شدید زخمی ہونے والےسرفراز بھی گنگولی جدہ جماعت کے سرگرم رکن ہیں سماجی کاموں میں سرگرم رہتے ہیں۔اللہ ان کی خدمات کو قبول فرمائے۔
خیال رہے کہ گولی ہوڑے، بھٹکل سے قریب 35 کلو میٹردور اور بیندور سے قریب 12 کلو میٹر دور واقع ہے۔
