دھرم شالہ،14 /ستمبر(ایس او نیوز/ آئی این ایس انڈیا) کپتان وراٹ کوہلی کی قیادت والی ہندوستانی ٹیم اتوار سے یہاں جنوبی افریقہ کے ساتھ شروع ہونے والی تین میچوں کی دو طرفہ سیریز کے ساتھ ہی عالمی ٹی 20 کے خطاب کو حاصل کرنے کی تیاریوں میں لگ جائے گی۔ویسٹ انڈیز کے خلاف سیریز میں 3-0کی جیت ان کی تیاریوں کا آغازتھا جس نے ون ڈے ورلڈ کپ کی مایوسی کو کسی حد تک دور کیا۔ ٹیم کا اصل امتحان اب کوئنٹن ڈی کوک اور کیگسو رباڈا کے خلاف اس سیریز کے ساتھ شروع ہوگا۔رباڈا کا اچھا اسپیل اور ڈیوڈ ملر کی کارکردگی ہندوستانیوں کے لئے چیلنج پیش کر سکتی ہے جبکہ فاف ڈو پلیسس اور ہاشم آملہ کی غیر موجودگی میں کچھ دیگر ٹیسٹ کے ماہر کھلاڑی جیسے ٹیمبا باوما یا اینرک نارجے اپنی اہمیت ثابت کرنا چاہیں گے۔ اگلے سال اکتوبر میں آسٹریلیا میں ہونے والے ورلڈ ٹی 20 کے لیے ٹیم کاکامل مجموعہ تیار کرنے کی مہم میں کپتان کوہلی اور کوچ روی شاستری کے لیے تقریبا 20 میچ باقی ہیں۔ اب بھی بہت سے سوالات ایسے ہیں جن کا جواب ٹیم مینجمنٹ کو اگلے 13 مہینوں میں دینا ہوگا ور اس دوران آئی پی ایل بھی منعقد کیا جائے گا۔