بھٹکل 8/فروری(ایس اؤ نیوز) بھٹکل کے مشہور و معروف نشاط نرسنگ ہوم میں 8 فروری 2020بروز سنیچر کو بھٹکل کے پہلے  ’کینسر کلینک‘ کا افتتاح ہوا۔ جہاں منگلورو کے مشہور اے جے اسپتال کے کینسر ماہر ڈاکٹر رچن شٹی کی خدمات حاصل رہے گی۔ اس بات کی جانکاری  منتظمین نے دی۔

نشاط نرسنگ ہوم بھٹکل کے منتظمین نے تفصیلات بتاتے ہوئےکہاکہ 9 فروری بروز اتوار سے کلینک اپنی خدمات شروع کرے گی۔جہاں  کینسر ماہر  ڈاکٹر رچن شٹی ہر اتوار کی صبح 10بجے سے دوپہر 1بجے تک کینسر مریضوں کی تشخیص کریں گے ۔  ضرورت مندوں سے اپیل کی گئی ہے کہ وہ 9481092655پر  کال کرکے  اپنا نام درج کرواسکتےہیں۔

صبح میں قاضی جماعت المسلمین بھٹکل مولانا محمد اقبال ملا ندوی کی دعا سے کینسر  کلینک کا افتتاح ہوا۔ شام 5بجے منعقدہ افتتاحی تقریب میں قاضی مرکزی خلیفہ جماعت المسلمین بھٹکل مولانا خواجہ معین الدین اکرمی مدنی نے ’ڈے کئیر کینسر کلینک‘ کا قفل کھولتے ہوئے افتتاح کیا۔ اس موقع پر موجود معزز شخصیات نے کہاکہ دنیا میں تعلیم اور صحت کے دو میدان ایسے ہیں جہاں ایک دوسرے کا  مذہب سے کوئی تعلق نہیں رہتا ، استاد اور ڈاکٹر دونوں مذہب کی تفریق کئے بغیر اپنے فرائض کو انجام دیتے ہیں جب کہ شاگرد اور مریض ان کی تجویز کردہ راہ پر چلتے ہوئے کامیاب و صحت یاب  ہوتے ہیں۔

افتتاحی تقریب کی  ڈاکٹر جلال الدین ملا نے  صدارت کی ۔ اس موقع پرجامع مسجد کے امام و خطیب مولانا عبدالعلیم خطیب ندوی  ، نائب قاضی مولانا عبدالرب خطیب ندوی،  سرکاری اسپتال کی میڈیکل آفیسر ڈاکٹر سویتا کامت ، بھٹکل ایجوکیشن ٹرسٹ کے چیرمن ڈاکٹر سریش نائک،ماہر اطفال ڈاکٹر روی راج اور وصی   اللہ جلال موجود تھے۔