امریکہ اور کینیڈا کی سرحدی پابندیوں میں مزید ایک ماہ کی توسیع کا امکان

Source: S.O. News Service | Published on 14th May 2020, 3:59 PM | عالمی خبریں |

واشنگٹن،14؍مئی (ایس او نیوز؍ایجنسی) امریکہ اور کینیڈا کی جانب سے کرونا وائرس کے باعث سرحدی پابندیوں میں مزید ایک ماہ کی توسیع کا امکان ہے۔

خبر رساں ادارے 'رائٹرز' کے مطابق کینیڈا کی حکومت کے ذرائع اور امریکہ میں حکام نے پابندی برقرار رکھنے کے فیصلے کی تصدیق کی ہے۔

اس سے قبل دونوں ملکوں نے 18 اپریل کو اتفاق کیا تھا کہ وبا پھیلنے کے خدشے کے پیش نظر سرحدی پابندیاں 21 مئی تک برقرار رہیں گی۔

کینیڈا کی جانب سے مسلسل زور دیا جا رہا ہے کہ یہ پابندیاں مزید ایک ماہ برقرار رکھی جانی چاہیئیں۔ ممکنہ طور پر پابندیوں کا اطلاق 21 جون تک ہو گا۔

یاد رہے کہ امریکہ اور کینیڈا میں آٹھ ہزار 800 کلو میٹر طویل سرحد ہے جس پر تجارت کی اجازت ہے۔ یہ دنیا کی سب سے بڑی تجارتی سرحد بھی ہے اور کینیڈا کی 75 فی صد اشیا کی برآمد امریکہ کو کی جاتی ہے۔

'رائٹرز' نے کینیڈا میں سرکاری عہدیداروں کا حوالہ دیتے ہوئے رپورٹ کیا ہے کہ فوری طور پر سرحدی پابندیو کو ختم نہیں کیا جا سکتا۔

حکام کا کہنا ہے کہ پابندیوں میں توسیع کے حوالے سے اقدامات کر رہے ہیں۔

امریکہ کے ڈپارٹمنٹ آف ہوم لینڈ سیکیورٹی کے سیکریٹری چاڈ وولف کے مطابق کینیڈا اور میکسیکو کے ساتھ سرحدوں پر نافذ پابندیوں میں مزید توسیع کی جا سکتی ہے۔

'رائٹرز' نے میکسیکو کی حکومت کے ذرائع کے حوالے سے رپورٹ کیا کہ پابندیوں میں توسیع ایک مخصوص مدت کے لیے کیے جانے کا امکان ہے۔

دو روز قبل کینیڈا کی چیف پبلک ہیلتھ آفیسر نے کہا تھا کہ امریکہ میں کیسز میں متواتر اضافہ ہو رہا ہے جو کہ خطرے کی علامت ہے۔

مقامی ذرائع ابلاغ نے کینیڈا کی جانب سے پابندیوں میں 30 دن کی توسیع کی درخواست کی خبریں شائع کی ہیں۔

کینیڈا کے وزیرِ اعظم جسٹن ٹروڈو نے کہا ہے کہ ہم پُر اعتماد ہیں کہ کینیڈا کے شہریوں کو وبا سے محفوظ رکھنے میں کامیاب رہیں گے۔

امریکہ کی جانز ہاپکنز یونیورسٹی کے اعداد و شمار کے مطابق کینیڈا میں کرونا وائرس سے 5425 افراد ہلاک ہو چکے ہیں جب کہ 73 ہزار 568 افراد میں وائرس کی تشخیص ہوئی ہے۔

کینیڈا میں مجموعی ہلاکتوں کی شرح سات فی صد ہے تاہم رواں ہفتے اموات کی شرح میں کمی آئی ہے اور یہ تین فی صد تک رہی ہے۔

دوسری جانب امریکہ کو کئی علاقوں میں وبا سے متعلق مشکل صورتِ حال کا سامنا ہے۔

امریکی ریاست نیو یارک وبا سے سب سے زیادہ متاثر ہوئی ہے جس کی سرحدیں کینیڈا کے صوبے انٹاریو اور کیوبک سے ملتی ہیں۔

کینیڈین حکام متواتر زور دیتے رہے ہیں کہ نیو یارک سے آنے والے ٹرک ڈرائیوروں کے ذریعے ان کے ملک میں وبا پھیلنے کا خدشہ موجود ہے۔

کینیڈا کی چیف پبلک ہیلتھ آفیسر تھریسا ٹام نے اس خدشے کا اظہار کیا ہے کہ پابندیوں میں نرمی کے بعد اگر احتیاطی تدابیر پر سختی سے عمل نہ کیا گیا تو کرونا وائرس تیزی سے پھیل سکتا ہے۔

اُن کا مزید کہنا تھا کہ امریکہ میں اب بھی کرونا وائرس کے کیسز موجود ہیں جب کہ وہاں وبا پر قابو پانے کی کوشش کی جا رہی ہے۔ ایسی صورتِ حال میں کینیڈا میں بھی اس کے پھیلنے کا خدشہ موجود ہے۔

ایک نظر اس پر بھی

ماسکو کنسرٹ ہال حملے میں 143ہلاکتیں

روس کے دارالحکومت ماسکو میں ایک کنسرٹ ہال پر جمعہ کو ہونے والے حملے میں مرنے والوں کی تعداد بڑھ کر 143 ہوگئی ہے جبکہ 100 سے زائد افراد زخمی ہیں۔روس کی تحقیقاتی کمیٹی نے ہفتے کے روز یہ اطلاع دی۔ کمیٹی نے کہا کہ ایمرجنسی سروسز ماسکو اوبلاست میں کروکس سٹی ہال، دہشت گردانہ حملے کی جگہ ...

80 ہزار افراد نے مسجد اقصیٰ میں نماز جمعہ ادا کی

قابض اسرائیلی فوجوں  کی سختی کے باوجود رواں  سال رمضان کے پہلے جمعہ کو ۸۰؍ ہزار مسلمانوں   نے بیت المقدس میں  پہنچ کر نماز جمعہ ادا کی۔ قدس نیوز نیٹورک نے جو ویڈیوشیئرکئے ہیں  میں  دیکھا جاسکتاہے کہ جوق در جوق مغربی کنارہ، راملہ اور دیگر علاقوں  سے فلسطینی شہری پیدل اور بسوں ...

شہریت ترمیمی قانون پر امریکہ نے بھی اپنی تشویش ظاہر کردی

امریکہ اور نے ہندوستان کے متنازعہ شہریت ترمیمی قانون پر عدم تحفظات کا اظہار کردیا۔ امریکی محکمہ خارجہ کے ترجمان نے بیان میں کہا کہ ہندوستان میں شہریت کے متنازعہ ترمیمی قانون کے نفاذ پر تشویش ہے۔ ایکٹ کے نافذ ہونے کے بعد صورتحال کا بغور جائزہ لے رہے ہیں۔

غزہ پر اسرائیلی حملوں کے سبب جان گنوانے والے فلسطینیوں کی تعداد 31272 ہوئی

غزہ پٹی پر جاری اسرائیلی حملوں سے فلسطینیوں کی ہلاکتوں کی تعداد 31272 ہو گئی ہے۔ غزہ میں قائم وزارت صحت نے بدھ کو یہ اطلاع دی۔ وزارت نے ایک بیان میں کہا کہ اسرائیلی فورسز نے گزشتہ 24 گھنٹوں کے دوران 88 فلسطینیوں کو قتل اور 135 دیگر کو زخمی کیا، جس سے گزشتہ اکتوبر میں اسرائیل اور حماس ...

غزہ میں امداد کیلئے قطار میں منتظر افراد کو پھر نشانہ بنایا گیا، 11 شہید

  انسانیت کی تمام حدوں  کو پار کرتے ہوئے اسرائیلی فوجوں  نے بدھ کو پھر بھکمری کے شکار ان پریشان حال لوگوں  کو نشانہ بنایا جو اپنے بچوں  کی پیٹ کی آگ بجھانے کیلئے امداد حاصل کرنے کے مقصد سے قطار میں  لگے ہوئے تھے۔ بدھ کے اس حملے میں  ۱۱؍ افراد کی شہادت کی تصدیق ہوئی ہے جس کے بعد ...

انڈونیشیا میں سیلاب اور چٹان کھسکنے سے تباہی، 19 افراد ہلاک ،متعدد زخمی

انڈونیشیا کے جزیرے سماترا میں مسلسل بارش نے سیلاب اور چٹان کھسکنے سے بڑے پیمانے پرتباہی ہوئی ہے۔ اس دوران 5سے زائد گھر دب گئے۔ مکانات کے ملبے سے12 لاشیں نکالی گئیں اور 7افراد کو شدید زخمی حالت میں اسپتال پہنچایا گیا۔ ملبے سے دیگر 6 افراد کو بحفاظت نکالا گیا جبکہ5 افراد اب تک ...