بھٹکل:30؍اکتوبر(ایس اؤ نیوز)کنداپور کی سرحد سے کاروار کی سرحد تک تعمیر کی جارہی فورلین قومی شاہراہ  پر ٹول فیس وصولی کو لےکر آئی آر بی کمپنی کی تیاریوں کو دیکھتے ہوئے ہایٔی وے ہوراٹا سمیتی شیرور نے آج 30 اکتوبر کو ’ ٹول چلو‘ احتجاج کئے  جانےکا اعلان کیا ہے۔

سمیتی کے صدر ستیش شٹی نےمطالبہ کیا ہے کہ ٹول پلازہ سے 10کلومیٹر دوری تک کے مقامی سواریوں کو ٹول فیس سے رعایت دی جائے ۔ ٹول فیس وصولی کو سرویس روڈ اور لنک روڈ کی تعمیر کے بعد ہی شروع کیا جائے  اور کنداپور اور شیرور کے درمیان بس شلٹر تعمیر کیا جایٔے اس طرح کے مطالبات لےکر بدھ کی صبح 10بجے شیرور ٹول پلازہ پر  احتجاج کیا جارہاہے۔ انہوں نے بتایا کہ جس طرح ساستھان پلازہ پر مقامی سواریوں کو رعایت دی گئی ہے بالکل اسی نہج پر  شیرور ٹول پلازہ پر بھی  رعایت دینی ہوگی۔

ادھر دوسری طرف آئی آر بی کمپنی کی طرف سے ٹول فیس وصولی کی تیاری کو دیکھتے ہوئے مقامی لوگوں نے بھی سخت اعتراض جتایاہے۔

اس سلسلےمیں منتظمین نے عوام الناس سے درخواست کی ہے کہ 10کلومیٹر تک کے علاقوں  والے تمام سواری مالکان اپنی اپنی سواریوں کے آرسی بک، لائسنس وغیرہ کی نقل احتجاج کے موقع پر جمع کرائیں تاکہ رعایت حاصل کرنےمیں آسانی ہو۔ انہوں نے بھٹکل شہر کو بھی شامل کرتے ہوئے عوام کو زیادہ تعداد میں شریک ہونےکی اپیل کی ہے۔ اس تعلق سے بھٹکل کے عوام سے بھٹکل ٹیکسی و ٹمپو مالکان سنگھا کی جانب سے درخواست کی گئی ہے کہ وہ اپنی گاڑی کے دستاویزات کی کاپیاں سنگھا کے پاس جمع کرایٔیں اور بڑی تعداد میں احتجاج میں شریک ہوکر بھٹکل کی سواریوں کے لیٔے بھی ٹول فری کروایٔیں۔