بنگلورو،31/مئی(ایس او نیوز) ریاست کی کانگریس جے ڈی ایس مخلوط حکومت کو برگشتہ کانگریس اراکین اسمبلی کی طرف سے درپیش خطرے کی پرواہ کئے بغیر سابق وزیراعلیٰ اور حکمران اتحاد کی رابطہ کمیٹی کے چیرمین سدرامیا اب بھی اپنی ضد پر قائم ہیں کہ کمار سوامی وزارت میں ہرگز توسیع نہیں کی جائے گی۔اخباری نمائندوں سے بات چیت کرتے ہوئے سدرامیا نے یہ بات دہرائی کہ مخلوط حکومت کو کوئی خطرہ لاحق نہیں ہے۔ فی الوقت حکومت یا رابطہ کمیٹی کے روبرو کابینہ میں ردوبدل کی کوئی تجویز زیر غور نہیں ہے۔ سدرامیا کایہ بیان کانگریسیوں میں ایک نئی بے چینی کا سبب بنا ہوا ہے، کیونکہ بہت سارے اراکین کو یہ امید تھی کہ وزارت میں کی جانے والی ممکنہ ردوبدل کے ذریعے وہ اپنی جگہ بناسکیں۔ تاہم سدرامیا نے آج صرف وزارت میں توسیع کا اعلان کرکے بیشتر اراکین اسمبلی کی امیدوں پر پانی پھیر دیا اور ساتھ ہی ایک بار پھر آپریشن کمل کے ذریعے بی جے پی کی طرف سے مخلوط حکومت کو گرانے کی کوششوں کا راستہ بھی ہموار کردیا۔ اس سلسلے میں سوال پر سدرامیا نے کہا کہ بی جے پی کی طرف سے مخلوط حکومت کو غیر مستحکم کرنے کی کوششیں کافی عرصے سے چل رہی ہیں، لیکن ہر بار اس کے ہاتھ ناکامی ہی لگی ہے۔ اس بار بھی بی جے پی کو ناکامی ہی دیکھنا پڑے گا۔مخلوط حکومت اپنی میعاد پوری کرے گی اور عوام کی امنگوں کے مطابق اگلے چار سال کے دوران کام کرے گی۔ لوک سبھاانتخابات کے نتائج پر سدرامیا نے کہاکہ ان کا تعلق مرکزی حکومت سے ہے۔ ریاست کی سیاست پر ان کا کوئی اثر نہیں پڑے گا۔ ریاستی اسمبلی تحلیل کردینے کے متعلق یڈیورپا کے بیان پر سدرامیا نے ردعمل ظاہر کرتے ہوئے کہاکہ ایسے مرحلے میں جبکہ واضح اکثریت کے ساتھ حکومت قائم ہے۔بی جے پی کو حق نہیں ہے کہ ریاست میں مخلوط حکومت کو گراکر صدر راج نافذ کرنے یا اسمبلی تحلیل کرنے کی سفارش کرے۔