ایک لوک سبھا اور دو اسمبلی حلقوں میں 17/اپریل کو ضمنی انتخابات
بنگلورو،17؍مارچ (ایس او نیوز) ریاست کرناٹک کے ایک لوک سبھا حلقہ اور دو اسمبلی حلقوں میں ضمنی انتخابات کا آج اعلان کردیاگیا۔ ان تینوں حلقوں میں 17؍اپریل کو پولنگ ہوگی اور2؍مئی کو نتائج کا اعلان کیا جائے گا۔ جن تین حلقوں میں ضمنی انتخابات ہونے والے ہیں وہ بیلگاوی لوک سبھا حلقہ، مسکی اوربسوا کلیان اسمبلی حلقہ ہے۔ الیکشن کمیشن آف انڈیا نے ان تینوں حلقوں میں ضمنی انتخابات کا آج اعلان کردیا ہے۔ حالانکہ حال ہی میں سندگی کے رکن اسمبلی سی ایم منگولی کا دیہانت ہوگیا تھا لیکن الیکشن کمیشن نے اس حلقہ کے لئے ابھی ضمنی انتخاب کا اعلان نہیں کیا ہے۔23/مارچ کو مذکورہ 3/حلقوں کے انتخابات کے لئے نوٹی فکیشن جاری کیا جائے گا۔30/مارچ کاغذات نامزدگیاں داخل کرنے کی آخری تاریخ،31/مارچ نامزدگیوں کی جانچ پڑتال،3/اپریل پرچے نامزدگیاں واپسی لینے کی آخری تاریخ ہے۔ ان تینوں حلقوں میں 17/اپریل کو پولنگ ہوگی۔ 2/مئی کو ووٹوں کی گنتی کے بعد اسی دن نتائج کا اعلان کیا جائے گا۔ ضمنی انتخابات کے اعلان کے ساتھ ہی تینوں حلقوں میں انتخابی ضابطہ اخلاق نافذ ہوچکا ہے۔ مرکزی وزیر سریش انگڈی اور بسوا کلیان کے رکن اسمبلی کے دیہانت سے بیلگاوی اوربسوا کلیان میں ضمنی چناؤ ہورہے ہیں جبکہ مسکی اسمبلی حلقہ کے پرتاب گوڑا پاٹل کے استعفیٰ سے ان حلقوں میں ضمنی چناؤ ہورہے ہیں۔