21اکتوبر کو ہوگایلاپوراسمبلی حلقہ کا ضمنی انتخاب۔ لاگو ہوگیا انتخابی ضابطہ اخلاق۔ سیلاب زدہ علاقے میں راحت رسانی کے لئے نہیں ہوگی رکاوٹ
کاروار 22/ستمبر (ایس او نیوز) ضلع شمالی کینرا کے یلاپور اسمبلی حلقے کے کانگریسی ایم ایل اے شیورام ہیباربھی ان 17اراکین اسمبلی میں شامل تھی جنہیں مخلوط حکومت گرانے کی سازش کے تحت مستعفی ہونے پر اسپیکر رمیش کمار نے نااہل قراردیاتھا۔اب الیکشن کمیٹی نے جن خالی نشستوں پر ضمنی انتخابات کا اعلان کیا ہے اس میں یلاپور اسمبلی حلقہ بھی شامل ہے۔
ضلع ڈپٹی کمشنر ڈاکٹر ہریش کمار نے اپنے دفتر میں منعقدہ پریس کانفرنس میں بتایا کہ الیکشن کمیشن کی طرف سے 12اکتوبر کو اس نشست پر ضمنی انتخاب منعقد کرنے کے اعلان کے سات ہی ضلع بھر میں انتخابی ضابطہ اخلاق نافذ ہوگیا ہے۔ انہوں نے کہا کہ سیلاب زدہ علاقوں میں راحت رسانی کی سرگرمیاں اس سے مستثنیٰ رہیں گی۔لیکن راحت رسانی کے بہانے ووٹروں کو لالچ یا رشوت دینے کی کوشش کرنے پرکٹھن کارروائی کی جائے گی۔ اس کے علاوہ ضابطہ اخلاق کی کسی بھی طرح کی خلاف ورزی برداشت نہیں کی جائے گی۔اس لئے سیاسی پارٹیوں کی جانب سے ضابطہ اخلاق کی پوری طرح پابندی کی یقین دہانی کرنی ہوگی۔اس کے علاوہ امیدواروں اور سیاسی پارٹیوں کو اپنے حدود میں رہ کر ہی کام کرنا ہوگا۔
یلاپور اسمبلی حلقہ میں یلاپور کے علاوہ پورا منڈگوڈ اور سرسی تعلقہ کا بنواسی کا علاقہ شامل ہے۔ کُل 231پولنگ بوتھس اور 1,72,630 ووٹرس ہیں جن میں 87942مرد اور 84687خواتین ہیں۔ 29ستمبر کو انتخابی نوٹی فکیشن جاری ہوگا۔ 30ستمبر سے نامزدگی فارم داخل کیا جاسکے گا۔ یکم اکتوبر کو فارم کی جانچ ہوگی۔ 3اکتوبر کو نام واپس لینے کی آخری تاریخ ہوگی۔21اکتوبر کو ووٹنگ کے بعد 24اکتوبر کو ووٹوں گنتی اور نتیجے کا اعلان ہوگا۔27اکتوبر کوضمنی انتخابی کارروائی پوری طرح مکمل ہوجائے گی۔