بھٹکل میں پرائیویٹ بس اور لاری کی ٹکر؛ بس ڈرائیور سمیت سات زخمی
بھٹکل 7/جون (ایس او نیوز) یہاں تعلقہ کے بیلکے نیشنل ہائی وے 66 پر ہوئے ایک سڑک حادثے میں سات افراد شدید زخمی ہوگئے، جنہیں بھٹکل سرکاری اسپتال میں ابتدائی طبی امداد فراہم کرنے کے بعد کنداپور اسپتال منتقل کیا گیا ہے۔
حادثہ پھر ایک بار وی آر ایل بس کے ساتھ پیش آیا جس نے اس بار ایک لاری کو ٹکر دی ۔ حادثہ بدھ صبح قریب چار بجے پیش آیا ۔ بتایا گیا ہے کہ بس بیلگام سے مینگلور جارہی تھی، بھٹکل سے آگے بیلکے میں غلط راستے پر جاکر لاری سے ٹکراگئی۔ حادثے میں بس ڈرائیور بھی زخمیوں میں شامل ہے، جس کے پائوں کو شدید چوٹ لگی ہے۔
حادثے میں زخمی ہونے والوں کی شناخت وجئے پرتاپ سنگھ (30)، رمیش (31)، ہیمنت (18)، وینسینٹ (35)، سنتوش (29)، ابھیشک (27) اور انیل(20)کی حیثیت سے کی گئی ہے۔
بھٹکل رورل پولس تھانہ میں حادثے کے تعلق سے معاملہ درج کیا گیا ہے اور پولس چھان بین کررہی ہے۔
واضح رہے کہ بھٹکل اور اطراف میں نیشنل ہائی وے کا کام جاری ہے، جس کے پیش نظر کئی جگہوں پر تعمیراتی کام مکمل ہونے پر آنے اور جانے کے لئے الگ الگ راستے کھول دئے گئے ہیں تو کئی جگہوں پر راستوں کا کام نامکمل ہونے کی وجہ سے ایک ہی روڈ پر سواریوں کو آنا اور جانا پڑتا ہے، کئی جگہوں پر شاہراہ اچانک کبھی دائیں اور کبھی بائیں مڑجاتی ہے، جس سے ڈرائیور کو سواری پر قابو پانا مشکل ہوجاتا ہے،سمجھا جارہا ہے کہ اسی وجہ سے حادثات میں روزبروز اضافہ ہورہا ہے۔
خیال رہے کہ چند روز قبل منکی کے قریب آننت واڑی نیشنل ہائی وے پر وی آ ر ایل بس ایک باراتیوں سے بھری ٹمپو سے ٹکراگئی تھی جس کے نتیجے میں دلہن سمیت آٹھ افراد ہلاک ہوگئے تھے، جبکہ اسی بس کا ایک حادثہ ہاویری میں بھی حال ہی میں پیش آچکا ہے۔
