منگلورو : مسافروں سے بھری چلتی بس میں گر گیا ڈرائیور کا بلڈ پریشر ۔ بے ہوش ہونے سے قبل لگائے بریک ۔ بال بال بچ گئے تمام مسافر
منگلورو : 22 / جولائی (ایس او نیوز) پتور سے منگلورو آرہی ایک پرائیویٹ بس کے ڈرائیور کا بلڈ پریشر اچانک ڈاون ہوگیا جس کی وجہ سے وہ اسٹیرنگ وھیل پر ہی بے ہوش ہوگیا، مگر اس نے اپنی حاضر دماغی کا ثبوت دیتے ہوئے بس کو سڑک کے کنارے لاکر بریک لگائے جس کی وجہ سے تمام مسافر ایک بڑے حادثہ سے بال بال بچ گئے ۔
بتایا جاتا ہے کہ پوری طرح مسافروں سے بھری ہوئی مذکورہ بس پتور سے جب اڈیار میں واقع سہیادری کالج کے قریب پہنچی تو ڈرائیور سنتوش کی آنکھوں کے سامنے اندھیرا چھانے لگا۔ اس نے فوراً بس کو ہائی وے کے کنارے لے کر کالج گیٹ کے پاس بریک لگا دئے اور اسٹاپ بٹن آن کر دئے۔ ادھر بس رکی اور اُدھر سنتوش اسٹیئرنگ وھیل پر جھک گیا ۔ ڈرائیور کے گرتے ہی بس میں موجود مسافروں کی چیخیں نکل گئیں ۔ لیکن سنتوش کی حاضر دماغی نے مسافروں کے تحفظ کو یقینی بنایا ۔ مسافروں کا کہنا ہے کہ بس ویسے بھی بہت تیز رفتاری سے چل رہی تھی اس وقت اگر ڈرائیور ایک لمحہ کی بھی غفلت کرتا تو بہت بڑا سانحہ ہوگیا ہوتا۔