لنگنامکی ڈیم سے بنگلور کو پانی کی فراہمی: ایڈی یورپا کی مخالفت
بنگلورو،25؍جون (ایس او نیوز) بھارتیہ جنتاپارٹی (بی جے پی) کے ریاستی صدر سابق وزیر اعلیٰ بی ایس ایڈی یورپا نے بنگلور شہرکو لنگنامکی ڈیم سے پینے کا پانی فراہم کرنے کی تجویز کی مخالفت کی- انہوں نے کہا کہ بنگلور کو لنگنامکی ڈیم سے پانی کی فراہمی کا منصوبہ نہ صرف غیر ممکن بلکہ غیر سائنٹفک ہے- حکومت نے اس منصوبے کے لئے تفصیلی رپورٹ (ڈی پی آر) تیار کرنے کی ہدایت دی ہے لیکن جب پورا منصبوبہ غیر سائنٹفک اور ناقابل عمل ہے تو ڈی پی آر کی تیاری عوام کے پیسے کی بربادی ہے- انہوں نے کہا کہ اس منصوبے کی کئی حلقوں کی طرف سے مخالفت ہورہی ہے- خصوصاً شیموگہ اور آس پاس کے عوام اس منصوبے کے سخت مخالف ہیں اور علاقے کے بیشتر منتخب عوامی نمائندے بھی اس تجویز کے خلاف ہیں - ایڈی یورپا نے کمار سوامی کی شدید تنقید کرتے ہوئے کہا کہ وزیر اعلیٰ ریاست میں پانی کا مسئلہ حل کرنے کے لئے اقدامات نہیں کررہے ہیں - انہوں نے کہا کہ ریاست کے بیشتر اضلاع میں پینے کے پانی کی شدید قلت ہے مگر وزیر اعلیٰ ”دیہی قیام“ میں مصروف ہیں - ریاستی کابینہ کے کسی وزیر نے قحط زدہ اضلاع کا دورہ نہیں کیا- ایڈی یورپا نے کہا ”وزیر اعلیٰ اور ان کی کابینہ کے رفقاء کوچاہئے کہ ریاست میں پانی کے مسئلے کی طرف دھیان دیں اور لوگوں کو کم سے کم پینے کے لئے پانی فراہم کرنے کے لئے اقدامات کریں -