آج کرناٹک کے وزیراعلیٰ کماراسوامی کی اضلاع کے افسروں کے ہمراہ ویڈیو کانفرنس
بنگلورو۔14/مئی(ایس او نیوز) ریاست میں خشک سالی اور پانی کی قلت سے عوام کو درپیش مسائل کی یکسوئی کے لئے ضلعی انتظامیہ کو ہدایات جاری کرنے کے لئے وزیر اعلیٰ ایچ ڈی کمار سوامی کل تمام اضلاع کے ڈپٹی کمشنروں، ضلع پنچایتوں کے چیف ایگزی کیٹیو افسروں اور دیگر اعلیٰ عہدیداروں کے ساتھ ویڈیو کانفرنس کریں گے۔
پچھلے دو ماہ سے ریاست میں انتخابی ضابطہئ اخلاق لاگو رہنے کے سبب ڈپٹی کمشنروں کے ساتھ ضلعی سطح کی پیش رفت کا جائزہ نہیں لیا جاسکا۔ کل وزیر اعلیٰ سرکاری افسروں کے ساتھ اضلاع میں خشک سالی کی صورتحال کا تفصیلی جائزہ لیں گے۔ پینے کے پانی کی فراہمی کے لئے ہونے والے انتظامات، مویشیوں کے لئے چارہ بینک، بے روزگاروں کے لئے روزگار ضمانت اسکیم کے تحت مزدوری، اور دیگر اہم مسائل کا جائزہ اس ویڈیو کانفرنس کے ذریعے لیا جائے گا۔ کمار سوامی کی صدارت میں منعقدہ حالیہ کابینہ اجلاس میں طے کیا گیا تھا کہ سوائے ان اضلاع کے جہاں ضمنی انتخاب ہورہا ہے ریاست کے باقی حصوں میں خشک سالی سے نپٹنے کے لئے راحت کاری کو آگے بڑھایا جائے گا۔ اس کے علاوہ ریاست کے بعض حصوں میں حالیہ بارش کے سبب ہوئے نقصان کا بھی کمار سوامی میٹنگ کے دوران جائزہ لیں گے۔