منگلور و شہر کی مصروف سڑک دھنس گئی تو نمودارہوا انگریزوں کے زمانے کاقدیم کنواں
منگلورو26/اکتوبر (ایس ا ونیوز) منگلورو کے بولار علاقے میں برسات کی وجہ سے مصروف ترین سڑک اچانک دھنسنے لگی اور بیچ سڑک پر انگریزوں کے زمانے میں تعمیر کیاگیاوہ قدیم کنواں ابھر آیا جسے پچھلی کچھ دہائیوں قبل بلدیہ کی طرف سے بند کردیا گیا تھا کیونکہ یہاں پر خودکشی کرنے والوں کی تعداد میں اضافہ ہوگیا تھا۔
اس سڑک کے کنارے واوع رادھا کرشنا سائیکل اسٹور کے مالک چترنجن داس بنگیرا بتاتے ہیں کہ انہوں نے دیکھا کہ سڑک کے بیچوں بیچ پانی کا چشمہ سا دکھائی دے رہا ہے اور بچے اسے برسات کاپانی سمجھ کر اس میں کھیلنے کی کوشش کررہے ہیں۔ چونکہ وہ جانتے تھے کہ اس سڑک کے نیچے کسی زمانے میں ایک کنواں ہواکرتا تھا جسے ’لی ویل‘ کے نام سے جاناجاتا تھا، اس لئے وہ چوکنا ہوگئے اور انہوں نے بچوں کو وہاں سے فوراً بھگا دیا۔ پھر قریب جاکر جائزہ لینے پر معلوم ہوا کہ برسوں پہلے جس کنویں کو خودکشی کے واقعات کے اضافے کے پیش نظر بندکردیا گیا وہ سڑک دھنسنے کی وجہ سے پھر سے ابھر آیا ہے۔ بنگیرا نے اس کی اطلاع پویس اور شہری بلدیہ کو دے دی جنہوں نے موقع پر پہنچ کر اس کنویں کے اطراف رکاوٹیں کھڑی کردیں۔
معلوم ہوا ہے کہ یہ کنواں ’لی‘ نامی انگریزی افسر نے تعمیر کیا تھا اور اسی کے نام سے منسوب تھا۔ پرانے زمانے میں اطراف میں بسنے والے پچاس سے زئد گھروں کے افراد کنویں میں تین طرف لگی ہوئی چرخیوں سے پانی حاصل کیا کرتے تھے۔ کنویں سے متصل ایک ٹینک ہوا کرتی تھی جس سے گھوڑوں اور دیگر مویشیوں کو پانی پلایا جاتا تھا۔ لیکن وقت کے ساتھ شہری آبادی بھی بڑھنے لگی اور اس کنویں میں کود کر خودکشی کرنے والوں کی تعداد میں بھی اضافہ ہوتا گیا۔مقامی افراد کا کہنا ہے کہ اسی وجہ سے شہری بلدیہ نے تقریباً پچاس سال قبل اس کنویں کو ہمیشہ کے لئے ڈھک دیااور اس کے اوپر سڑک بنانے کے علاوہ قریب میں ہی ایک بس اسٹانڈ تعمیر کردیا۔
مگر اب کی بار جو شدید برسات ہوئی ہے شاید اس کی وجہ سے اطراف کی زمین اندرونی طور پر کمزور ہوگئی اور سڑک نیچے کی طرف دھنسنے لگی، تو یہ پرانا کنواں پھر سے نمودار ہوگیا ہے۔حالانکہ اس کنویں اور انگریز افسر کے تعلق سے کوئی تاریخی تفصیل دستیاب نہیں ہے، لیکن گمان کیا جاتا ہے کہ جی لی موریس نامی پرنسپال کلکٹر جو 1863-64کے دوران یہاں تعینات تھا، اسی نے یہ کنواں تعمیر کیا ہوگا اس لئے اور یہ کنواں ’لی ویل‘کے نام سے معروف ہوگیا ہوگا۔
سڑک کے بیچ میں قدیم کنواں نمودار ہونے کی خبر ملنے پر ایم ایل سی ایوان ڈیسوزا کے علاوہ سیکڑوں متجسس شہریوں نے اس مقام پر پہنچ کر معائنہ کیا۔ جبکہ منگلورو کے ڈپٹی کمشنر ایس اجیت کمار ہیگڈے نے بتایا کہ انہوں نے محکمہ آثار قدیمہ اور پولیس کو اس ضمن میں مراسلہ بھیجا ہے، اور آئندہ کارروائی کے سلسلے میں منصوبہ بنانے کی ہدایت دی ہے۔
