بھٹکل 21/مئی (ایس او نیوز) ضلع اُترکنڑا کے سرسی میں  پچھڑی ذات کے لڑکے کی اونچی ذات والی لڑکی سے شادی کرنے پر  معاملہ ہاتھاپائی تک پہنچ گیا جس کے نتیجے میں چھ لوگ زخمی ہوگئے جنہیں  قریبی اسپتال میں داخل کیا گیا ہے۔واقعہ  سرسی تعلقہ کے بنواسی کے قریب کیروتّی قصبہ میں  پیر کو پیش آیا۔

ذرائع سے ملی اطلاع کے مطابق  سرسی سے تعلق رکھنے والے کرشنا چنیّا  کو پڑوسی ضلع شموگہ کے سورب  کی رہنے والی  ایک لڑکی سے پیار ہوگیا ۔ کچھ روز قبل ان دونوں نے بنگلور میں شادی کرلی ، جس کے کچھ روز بعد دونوں  اپنے رشتہ داروں کے گھر سرسی آ گئے۔ بتایا گیا ہے کہ  لڑکا پچھڑی ذات کا ہے جبکہ لڑکی کا تعلق مڈیوار کمیونٹی سے ہے۔ پیر کو  لڑکی کے  چھ  رشتہ دار  اپنی لڑکی کو واپس لے  جانے سرسی کے کیروتّی پہنچے  جس کے دوران دونوں  خاندانوں کے کارکنوں کے درمیان جھڑپ شروع ہوگئی جو آگے چل کر ہاتھاپائی میں منتقل ہوگئی جس کے نتیجے میں چھ لوگ  زخمی ہوگئے۔ زخمیوں کو سرسی تعلقہ اسپتال میں داخل کیا گیا ہے۔

بنواسی پولس تھانہ میں معاملہ درج کیا گیا ہے اور پولس مزید چھان بین کررہی ہے۔