ریو ڈی جنیرو،24؍جولائی(ایس او نیوز؍ایجنسی) جنوبی امریکی ملک برازیل میں عالمی وبا کورونا وائرس کے پھیلاؤ میں مسلسل اضافہ ہورہا ہے اور ملک میں گزشتہ 24 گھنٹوں کے دوران 59،961 نئے کیسز کی تصدیق کے بعد کورونامتاثرین کی تعداد بڑھ کر 2،287،475 ہوگئی ہے۔ جمعرات کو وزارت صحت نے بتایا کہ اس عرصے کے دوران 1311 افراد کی ہلاکت کے بعد ملک میں کورونا سے اموات کی تعداد بڑھ کر 84،082 ہوگئی ہےجب کہ اس وبا کے آغاز کے بعد سے اب تک تقریباً 15 لاکھ 70 ہزار افرادشفایاب ہوچکے ہیں۔

ایک روز قبل برازیل میں ایک ہی دن میں 67،8600 افراد کورونا سے متاثر ہونے اور 1،284 مریضوں کی موت ہوگئی تھی۔ برازیل،امریکہ کے بعد کورونا وائرس سے سب سے زیادہ متاثرہ ملک ہے یہ ملک اب بھی دنیا بھر میں دوسرے نمبر پر ہے۔ وہیں جان ہاپکنز یونیورسٹی کے مطابق ڈیڑھ کروڑ سے زیادہ افراد کورونا میں متاثر ہوچکے ہیں اور 631،000 افراد اپنی زندگی سے ہاتھ دھو بیٹھے ہیں۔