برازیلیا،23؍اگست(ایس او نیوز؍ایجنسی)  عالمی وبا کورونا وائرس (کووڈ ۔19) سے بری طرح متاثر لاطینی امریکی ملک برازیل میں گزشتہ 24 گھنٹوں کے دوران کورونا وائرس کے 50،032 نئے کیسز رپورٹ ہوئے ہیں اور متاثرہ افراد کی تعداد 35 لاکھ سے تجاوز کرکے 35،82،362 ہوگئی ہے۔

برازیل کی وزارت صحت کی جانب سے کل رات جاری کئے گئے اعداد و شمار کے مطابق گذشتہ 24 گھنٹوں کے دوران ملک میں وبا سے 892 اموات کے ساتھ ہی ہلاک شدگان کی مجموعی تعداد 1،14،250 ہوگئی ہے۔ اس سے قبل برازیل میں جمعہ کو کورونا وائرس کے 30،355 نئے کیسز رپورٹ ہوئے تھے اور کووڈ 19 سے 1054 افراد ہلاک ہوگئے تھے۔

امریکہ کی جان ہاپکنز یونیورسٹی کے سینٹر فار سائنس اینڈ انجینئرنگ (سی ایس ایس ای) کی جانب سے جاری تازہ ترین اعداد و شمار کے مطابق برازیل (35.82 لاکھ) پہلے ہی کورونا کی تعداد کے لحاظ سے امریکی (56.64 لاکھ) سے پیچھے ہے۔ کورونا کی وجہ سے ہونے والی اموات کی فہرست میں بھی برازیل ہی امریکہ کے بعد دوسرے نمبر پر ہے۔

برازیل کا سب سے زیادہ آبادی والا شہر ساؤ پالو کورونا سے بری طرح متاثر ہے اور اب تک 28،392 افراد اس وبا سے ہلاک ہو چکے ہیں۔ اس کے بعدریو ڈی جنیرو اور سیئرا میں بھی کورونا وائرس کے سب سے زیادہ کیسز پائے گئے ہیں۔ برازیل کی وزارت صحت کے مطابق ملک میں اب تک 27 لاکھ سے زیادہ افراد کورونا سے شفایاب ہو چکے ہیں۔