بھٹکل 6 جنوری (ایس او نیوز)  کنداپور کے کوٹیشور سے  آج جمعرات کو  برہما رتھ  مرڈیشور پہنچا جس کے استقبال کے لئے   کثیر تعداد میں  لوگ مرڈیشور کے داخلی گیٹ پر موجود تھے۔ پہلے یہاں پوجا پاٹ کی گئی پھر رتھ کو  ولگا منٹپ لے جایا گیا،  ریلی کی شکل میں رتھ کو   وولگا منٹپ  لے جانے کے دوران   سینکڑوں  لوگ موجود تھے۔

بتایا گیا ہے کہ  قریب 400 سال سے مرڈیشور مندر  میں موجود ایک رتھ کو   تیر حبّا کے موقع پر استعمال کیا جارہا تھا۔  جو کافی پرانا ہونےکے ساتھ ساتھ کافی  خستہ حال بھی ہوچکا تھا۔ مرڈیشور کو ترقی کی راہ پر لے جانے اور مرڈیشور کو  سیروتفریح کا اہم مرکز بنانے والے آر این شٹی  فیملی نے  اس بار اپنی جانب سے  نیا رتھ بناکر  دینے کا اعلان کیا تھا،  آر این شٹی  کی طرف سے اس برہمارتھ کو  بنانے کی ذمہ داری  کنداپور کے کوٹیشور  میں رتھ بنانے  میں ماہر  راج گوپال اچاری  اور اس کی ٹیم کو دی گئی  تھی۔   ایک بڑے  ٹرک پر لاد کر اس رتھ کو   آج مرڈیشور پہنچایا گیا ہے اور مرڈیشور کے وولگا منٹپ میں رتھ  کو   ٹرک  سمیت  پارک کیا گیا ہے۔

آر این شٹی   فیملی کی طرف سے معلومات فراہم کرتے ہوئے   مرڈیشور  کے اہم ذمہ دار ایس ایس کامتھ نے بتایا کہ  14 جنوری کو  یہ رتھ مرڈیشور مندر انتظامیہ کے حوالے کیا جائے گا۔ اس موقع پر خصوصی پوجا سمیت دیگر تقریبات  کا اہتمام کیا گیا ہے جس میں  شریک ہونے والوں کو  کھانے کا  بھی انتظام  رہے گا۔ انہوں نے  عقیدت مندوں سے اس تقریب میں  کثیر تعداد میں شریک ہونے کی بھی درخواست کی ہے۔

یاد رہے کہ ہرسال 20 جنوری کو مرڈیشور میں رتھ کھینچنے کی  تقریب منعقد ہوتی ہے جس میں ہزاروں لوگ شریک ہوتے ہیں۔