دبئی 17/فروری (ایس او نیوز) اُڈپی سے تعلق رکھنے والے معروف بزنس مین غیر مقیم ہندوستانی اورعرب امارات میں این ایم سی ہیلتھ نامی کمپنی کے بانی اور نان ایکزیکٹیو چیرمین بی آر شیٹی نے اپنے عہدے سے استعفیٰ دے دیا ہے۔
میڈیا رپورٹس کے مطابق بی آر شیٹی کے ساتھ چیف انویسٹمنٹ آفیسر ہانی بوتیخی اور بورڈ کے رکن عبدالرحمن باصدیق بھی 16فروری سے مستعفی ہوگئے ہیں۔ این ایم سی ہیلتھ کمپنی کے مالی معاملات سے متعلق پیچید گیوں کے بعدجمعہ کے دن این ایم سی کے نائب چیرمین خلیفہ بوطی عمیر بن یوسف نے بھی اپنے عہدے سے استعفیٰ دیا تھا۔
بتایا گیا ہے کہ بی آر شیٹی کی طرف سے کاروبار میں اپنی حصہ داری کے تعلق سے غلط بیانی کرنے کی بات سامنے آنے کے بعد یہ مسئلہ گزشتہ ہفتہ اس وقت پیچیدہ ہوگیا تھا جب یو کے کے قانونی ادارے نے کمپنی کے معاملات کی چھان بین کرنے کی بات کہی تھی۔این ایم سی کے مطابق اب مارک ٹامپکنس اس کمپنی کے تنہا نان ایکزیکٹیو چیر مین کی حیثیت سے اپنا کام آگے بڑھائیں گے۔
میڈیا رپورٹوں کے مطابق کمپنی میں اپنی حصص کو غلط انداز میں پیش کرنے کو لے کر بی آر شٹی کو جب بورڈ کے مباحثوں سے خارج کیا گیا تو اُس کے فوری بعد بی آر شٹی جنہوں نے ہی این ایم سی کمپنی کو کھڑا کیا تھا، اپنے عہدہ سے استعفیٰ دے دیا۔ اخبارنویسوں سے گفتگو کرتے ہوئے انہوں نے بتایا کہ بورڈ کے اجلاس سے انہیں خارج کرنے کے تعلق سے ان کے وکیل قانونی پہلووں کا جائزہ لے رہے ہیں، معاملہ صاف ہونے کے بعد وہ اگلا قدم اُٹھائیں گے۔
77سالہ ارب پتی باواگوتھو رگھورام شٹی عرف بی آر شٹی 1973 میں صرف 29 درہم اپنی جیب میں لے کر ابوظبی پہنچے تھے، انہوں نے ابتدا میں لیبارٹری میں کام کیا تھا اور 1975 میں نیومیڈیکل سینٹر (این ایم سی) کی بنیاد رکھی تھی۔ این ایم سی متحدہ عرب امارات میں اب سب سے بڑا میڈیکل نیٹ ورک چلاتا ہے ۔ یاد رہے کہ سن 2012 میں لندن کی فہرست میں بھی شامل ہونے والی این ایم سی پہلی کمپنی تھی۔