ہوناور تعلقہ کی سڑلگی ندی میں گونگا لڑکا غرق ہوکر لاپتہ؛ دو دوستوں کے ساتھ تیرنے کے دوران پیش آیا حادثہ
بھٹکل 19/مئی (ایس او نیوز) پڑوسی تعلقہ ہوناور کی سڑلگی ندی میں غرق ہوکر ایک پندرہ سالہ گونگا لڑکا لاپتہ ہوگیا جس کی شناخت پرجاول گوپال کی حیثیت سے کی گئی ہے۔ لڑکے کے تعلق سے پتہ چلاہے کہ وہ سرکاری ہائی اسکول میں آٹھویں یا نویں کلاس کا طالب علم تھا۔
سڑلگی کے سماجی کارکن جناب مظفر شیخ نے بتایا کہ پرجاول اپنے دو دوستوں کے ساتھ ہمیشہ کی طرح ندی میں تیرنے کےلئے اُترا تھا، اچانک ندی میں غرق ہوکر غائب ہوگیا، اس کے دو دوست واپس ندی کے اوپر آنے میں کامیاب رہے مگر پرجاول کا کوئی پتہ نہیں چل پایا۔ حادثہ بدھ دوپہر قریب 12:30 بجے اُپّنی پنچایت حدود کے سڑلگی ندی میں پیش آیا۔
واقعے کی اطلاع ملتے ہی ہوناور پولس جائے وقوع پر پہنچی۔ شام کا اندھیرا پھیلنے تک پولس اور مقامی لوگ ماہر غوطہ خوروں کی مدد سے لاپتہ پرجاول کو تلاش کرنے کی پوری کوشش کی، مگر کوئی پتہ نہیں چل پایا ۔
بتایا گیاہے کہ رات کو قریب میں واقع گیر سوپا ڈیم سے پانی چھوڑا جاتا ہے جس کو دیکھتےہوئے تلاشی مہم کو روکنا پڑا تھا۔ پتہ چلا ہے کہ رات کو ڈیم کا پانی چھوڑنے کے بعد ندی میں کافی زیادہ بہاو دیکھا گیا ہے ، اس لئے خدشہ ہے کہ لڑکا بہتے ہوئے کافی دور چلا جائے گا اور ممکن ہے کہ کل ہوناور بریج کے پاس اس کی نعش مل جائے۔
گونگے معذور لڑکے کے ساتھ پیش آئے اس حادثے کے بعد سڑلگی گاوں میں ماتم چھا گیا ہے۔
