بنگلورو، 18؍اپریل(ایس او نیوز)ریاست میں کورونامتاثرین کی تعدادمیں بے تحاشہ اضافہ کے پیش نظرریاستی وزیربرائے محصولات آراشوک نے ریاست کے ڈپٹی کمشنرزکے ساتھ  ایک اعلیٰ سطحی اجلاس چلایا۔

اجلاس کے بعدانہوں نے کہاکہ وائرس کے اضافہ کے پیش نظرریاست میں کسی قسم کے جاتراکی اجازت نہیں ہوگی۔اگرجاترے ہوتے ہیں تو اس کی راست ذمہ دار متعلقہ ضلع کے ڈپٹی کمشنرہی ہوں گے۔

انہوں نے مزیدکہاکہ ریاست میں شادی بیاہ تقریبات کے لیے ڈپٹی کمشنرسے پاس حاصل کرنالازمی ہوگا۔انڈورشادی محلوں میں 100افرادکی گنجائش فراہم کی گئی ہے۔آؤٹ ڈورہالوں میں 200افرادکوجمع کرنے کی اجازت دی گئی ہے۔شادی تقریب منعقدکرنے سے پہلے قریب میں واقع پولیس تھانہ سے پاس حاصل کرناضروری ہوگا۔

آر اشوک نے واضح کرتے ہوئے کہاکہ اس ضابطہ سے قبل جوشادیاں طے کی گئی ہیں ان پراس ضابطہ کااطلاق نہیں ہوگا۔نئے طورسے جوشادیا ں ہورہی ہیں ان پراس کااطلاق ہوگا۔نئے طے شدہ شادیا ں بغیرپاس کے نہیں ہو ں گی۔انہوں نے کہاکہ یہ ضابطہ سیاسی اجلاس اورتقاریب کے لیے بھی لاگوہوگا۔آراشو ک نے  ریاست کے تمام ڈپٹی کمشنرزکے ساتھ ایک اجلاس طلب کرتے ہوئے یہ ہدایات جاری کیں۔

اس موقع پرانہوں نے شہر بنگلورومیں بڑھتے معاملات پرتشویش ظاہرکرتے ہوئے سخت اقدامات کرنے کاتیقن دیا۔