ایڈی یورپا کے کرپشن میں بومئی حصہ دار : سدارامیا
بنگلورو، 19؍اکتوبر (ایس او نیوز) سابق وزیر اعلیٰ اور ریاستی اسمبلی کے اپوزیشن لیڈر سدارامیا نے وزیر اعلیٰ بسواراج بومئی کو سابقہ ایڈی یورپا حکومت کے کرپشن کا حصہ دار قرار دیا ہے۔ وجئے پور ضلع کے سندگی اسمبلی حلقہ میں کانگریس امیدوار کے حق میں انتخابی مہم کے دوران خطاب کرتے ہوئے انہوں نے کہا کہ ایڈی یورپا کی کابینہ میں بحیثیت وزیر داخلہ بومئی نے بھی خوب لٹ مچائی ہے۔ انہوں نے کہا کہ بومئی ریاست کے عوام کی طرف سے منتخب کئے گئے وزیر اعلیٰ نہیں بلکہ آر ایس ایس نے انہیں عوام پر مسلط کیا ہے۔ اب نیا چولہ پہن کر عوام کے سامنے آرہے ہیں اور ریاست میں مذہبی منافرت کو بڑھا وا دے کر ریاست میں زعفرانیت کو ہوا دینے کی کوشش میں لگے ہیں۔