بنگلورو، 30؍جولائی (ایس او نیوز؍ایجنسی)  کرناٹک کے وزیراعلیٰ  بسواراج بومئی نے بی جے پی  لیڈر پروین نیتارو اور دیگر کے قتل کو سوشل ڈیموکریٹک پارٹی آف انڈیا (ایس ڈی پی آئی) اور  کانگریس پارٹی کے ذریعہ ایک منظم جرم قرار دیااور سابق وزیر اعلیٰ اور کانگریس کے سینئر لیڈر سدارامیا کو  پاپو لر فرنٹ آف انڈیا (پی ایف آئی) کی بڑھتی ہوئی مجرمانہ کارروائیوں کے لیے مورد الزام ٹھہرایا ۔

بومئی نے  نامہ نگاروں کو بتایا، ”ہم نے پروین اور دیگر کے قتل کو بہت سنجیدگی سے لیا ہے۔ میں ان واقعات کو محض قتل کے طور پر نہیں دیکھ رہا ہوں۔ آپ اسے سمجھیں۔ یہ منظم جرائم ہیں۔ کچھ دن انتظار کریں آپ کو عمل نظر آئے گا۔ چیف منسٹر نے محمد فیصل کے قتل کا ذکر کرتے ہوئے کہا کہ ہم تمام ہلاکتوں کو ایک ہی انداز میں لے رہے ہیں۔ ہمارے لیے ہر شہری کی زندگی اہم ہے۔ ہم قتل میں ملوث افراد کے خلاف سخت ترین کارروائی کریں گے۔ 

فیصل کو جمعرات کی شام منگلورو کے مضافات  سورتکل  میں نقاب پوش شرپسندوں نے مہلک ہتھیار کا استعمال کرتے ہوئے قتل کر دیا تھا۔ جنوبی کنڑ اور اُڈپی اضلاع کی صورتحال کا جائزہ لینے کے سلسلے میں، مسٹر بومئی نے کہا کہ وہ ان علاقوں میں امن و امان کو برقرار رکھنے کے لیے پولیس کے ڈائریکٹر جنرل اور دیگر سینئر پولیس افسران کے ساتھ میٹنگ کر رہے ہیں۔

وزیر اعلی نے  سدارامیا کو تنقید کا نشانہ بناتے ہوئے کہا کہ موجودہ حکومت نے حالیہ ہلاکتوں میں ملوث افراد کے خلاف تیزی سے کارروائی کی ہے۔ ’’جب سدارامیا وزیر اعلیٰ تھے تو 32 قتل ہوئے تھے۔ وہ کیا کر رہے تھے ؟ ہم نے فوری کارروائی کی ہے اور پروین اور حملہ آوروں کو پہلے کے معاملات میں گرفتار کیا ہے۔ ,

مسٹر بومئی نے کہا، "اگر کوئی ہر چیز کو سیاست کے نظریےسے دیکھتا ہے، تو ایسا لگتا ہے۔ سدارامیا کے بیان کی کوئی اہمیت نہیں ہے۔ ہم حالات کو ہینڈل کرنا جانتے ہیں۔ انہوں نے کرناٹک میں ایس ڈی پی آئی اور پی ایف آئی کی مجرمانہ سرگرمیوں میں اضافہ کے لئے کانگریس بالخصوص مسٹر سدارامیا کو ذمہ دار ٹھہرایا۔ انہوں نے کہا، ’’سدارامیا  جب وزیر اعلیٰ تھے تو پی ایف آئی اور ایس ڈی پی آئی کارکنوں کے خلاف 200 سے زیادہ مقدمات واپس لے لیے تھے۔ ایس ڈی پی آئی اور پی ایف آئی کارکنوں نے اپنے ہی کانگریس ایم ایل اے تنویر سیٹھ  پر حملہ کیا تھا۔ اس کے باوجود سدارامیا نے انہیں راحت دی اور اب یہ لوگ آزاد گھوم رہے ہیں اور سنگین جرائم کر رہے ہیں۔