الال پُل سے نیتراوتی ندی میں چھلانگ لگانے والے شخص کی لاش 10دن بعد ہوئی برآمد
منگلورو26/اگست (ایس او نیوز) سداشیوا نامی نوجوان نے 16اگست کو الال پُل پر سے نیتراوتی ندی میں چھلانگ لگاکر خود کشی کی تھی۔بڑے پیمانے پر تلاشی مہم چلائی گئی تھی مگراس کا کوئی پتہ نہیں چلا تھا۔
لیکن دس دن بعد25اگست کو نیو منگلورو پورٹ ٹرسٹ کی بندرگاہ کے قرب ساحل پر سدا شیوا (29سال)کی لاش بر آمد ہوئی تو کوسٹ گارڈ نے پانمبور پولیس کو اس کی اطلاع کردی۔ پولیس نے موقع پر پہنچ کر لاش کو اپنے قبضے میں لیا اور اسے پوسٹ مارٹم کے لئے وینلاک ہاسپٹل میں بھیج دیا ہے۔
معلوم ہو اہے کہ سداشیوا کڈ با علاقے کا رہنے والا تھا اورریلوے اسٹیشن پر کام کیا کرتا تھا۔الال کے جپّینا موگارو میں کرایے کے مکان میں رہتاتھا۔ 16اگست کو اپنی ڈیوٹی ختم کرکے گھر جانے کے لئے نکلا تھا، مگر راستے میں نیتراوتی پُل کے پاس اس نے اپنی موٹر بائک روک دی اور ندی میں کود پڑا تھا۔خود کشی کی وجوہات کیا تھیں اس بارے میں کوئی بات معلوم نہیں ہوئی ہے۔