بھٹکل 20/جون (ایس او نیوز) بھٹکل تعلقہ کے چوتنی ندی سے آج صبح ایک 55 سالہ خاتون کی نعش برآمد ہوئی ہے جس کے تعلق سے پتہ چلا ہے کہ  موگلی ہونڈا کی رہنے والی یہ خاتون تین دنوں سے لاپتہ تھی۔ خاتون کی نعش دیکھ کر  اندازا لگایا گیا ہے کہ یہ قریب دو دن پرانی نعش ہے۔

خاتون کی شناخت زُلیخا  کی حیثیت سے کی گئی ہے جو گھروں میں محنت مزدوری کرکے اپنا گھر سنبھال رہی تھی۔ مقامی لوگوں نے بتایا کہ  گھر پر اکثر میاں اور بیوی کے درمیان جھگڑا ہوتے رہتا تھا  اور شراب کے نشے میں شوہر بیوی کی پیٹائی بھی کرتا تھا۔  پتہ چلا ہے کہ اکثر کسی کے ہاں شادی بیاہ کے موقعوں پر وہ گھروں میں جاکر کام کرتی تھی اور تین چار دن شادی والے گھروں میں ہی رہتی تھی۔ 

زُلیخا کے بھائی  محمد ناصر جو حنیف آباد کے رہائشی ہیں  نے بتایا کہ  مجھے جمعہ کو میری بھانجی نے فون کرکے بتایا کہ اُس کی  ماں زُلیخا  جمعرات کو گھر سے نکلی تھی، لیکن    اُس کا برقعہ اور دیگر چیزیں جو وہ   اپنے ساتھ لے جاتی تھی، وہ  گھر پرہی رکھی ہوئی ہیں، آج سنیچر کو میں اپنے بہنوئی (زُلیخا کے شوہر) کے ساتھ پولس تھانہ پہنچ کر گمشدگی کی رپورٹ درج کررہے تھے کہ  اس دوران خبر ملی  کہ چوتنی ندی میں  کسی خاتون کی نعش برآمد ہوئی ہے، پولس ہمیں اپنے ساتھ لے کر  جائےوقوع پر پہنچی تو ہم نے  شناخت کرنے میں دیر نہیں کی کہ یہ  زلیخا کی ہی نعش ہے۔

پولس نے دیگر کاروائیوں کے بعد نعش کو پوسٹ مارٹم کے لئے سرکاری اسپتال  میں  منتقل کیا ہے۔ پولس کو شک ہے کہ خاتون نے  شوہر کے ساتھ لڑائی جھگڑے سے تنگ آکر خودکشی کی ہوگی، مگر گھروالے اس معاملے کو قتل کے زاوے سے دیکھ رہے ہیں۔ پولس تمام  زاویوں سے معاملے کی چھان بین کررہی ہے ۔ تحقیقات کے بعد ہی  سچائی سامنے آسکتی ہے کہ آیا یہ قتل ہے یا خودکشی  ہے۔

پتہ چلا ہے کہ زُلیخا کی چاروں لڑکیوں کی شادی ہوچکی ہے اور وہ اپنے سسرال میں رہتی ہیں، زُلیخا کے دو بیٹوں میں ایک بیٹا شادی شدہ ہے اور دوسرا بینگلور میں ملازمت کرتا ہے۔ مقامی لوگوں نے بتایا کہ  گھر پر صرف میاں اور بیوی دونوں ہی رہتے تھے۔

پتہ چلا ہے کہ شرابی شوہر شفیع کو پولس نے  اپنی تحویل میں لیا ہے اور جانچ جاری ہے۔