جوئیڈا 13/اپریل (ایس او نیوز)  کل پیر کو جوئیڈا کی کالی ندی میں غرق ہوکر لاپتہ ہونے والے جوڑے  کی لاشیں آج منگل کو  برآمد کرلی گئی ہیں جن کی شناخت بیدر کے رہنے والے  پرشوتم پاٹل اور رکشھیتا کی حیثیت سےکی گئی ہے۔

ذرائع سے ملی اطلاع کے مطابق  پریم کا یہ جوڑا پیر کو جوئیڈا تعلقہ کے  گنیش گُڑھی میں  سوپا ڈیم کے قریبکالی ندی کے پل  پر کھڑےہوکر موبائل سے سیلفی لے رہا تھا،جس کےدوران توازن بگڑ گیا اور  ایک ساتھ دونوں ندی میں جاگرے، ندی میں گرتے ہی یہ دونوں پانی کے بہاو میں بہتے چلے گئے۔ پرشوتم بیدر کی  کرناٹک کالج میں گریجویٹ کررہا تھا، جبکہ بیدر کی رہنے والی  رکشھیتا گلبرگہ کالج میں انجینرنگ کررہی تھی۔

پیر کی شام سے ہی پولس اور فائر بریگیڈ کا عملہ  ندی میں دونوں کو تلاش کررہا تھا، آج منگل کو دونوں کی نعشیں برآمد کرلی گئیں۔ 

پولس نے بتایا کہ دونوں نعشیں  پوسٹ مارٹم کے لئے  بھیجی گئی ہیں، رپورٹ موصول ہونے کے بعد ہی  پتہ چلے گا کہ آیا یہ دونوں  حادثاتی طور پر ندی میں گرے تھے یا پھر یہ خودکشی کا معاملہ ہے۔