بھٹکل کے قریب منکی سمندر سے نامعلوم خاتون اور اس کی دو لڑکیوں کی نعشیں برآمد؛ خودکشی کا شبہ
بھٹکل 13/مئی (ایس او نیوز) بھٹکل سے قریب 25 کلو میٹر دور منکی سمندر کنارے ایک نامعلوم جوان خاتون اور دو لڑکیوں کی نعشیں برآمد ہوئی ہیں جن کے تعلق سے سمجھا جارہا ہے کہ یہ تینوں ماں اور بیٹیاں ہیں۔ شبہ ہے کہ ماں نے اپنی دو بیٹیوں کو پہلے رسی سے باندھ کر سمندر میں پھینکا ہوگا، پھرخود سمندر میں چھلانگ لگاتے ہوئے خودکشی کی ہوگی۔
منکی کے سماجی کارکن اور ساحل آن لائن کے نامہ نگار ذاکر کٹنگری نے بتایا کہ نعشوں کا معائنہ کرنے اور حالت دیکھنے سے اندازہ ہوتا ہے کہ ان تینوں نے غالباً کل اتوار شام کو سمندر میں چھلانگ لگاکر خودکشی کی ہوگی، دونوں لڑکیاں اور خاتون ایک دوسرے سے بندھی ہوئی حالت میں تھے ، خاتون اور ایک بچی کے بدن کے اوپری حصے کے کپڑے اُتر گئے تھے ، مگر ان کے جسم سے ہی لگے ہوئے تھے، سمجھا جارہا ہے کہ سمندری موجوں سے کپڑے اُتر گئے ہوں گے۔ اندازہ ہے کہ کسی بڑے پتھر پر سے ان لوگوں نے سمندر میں چھلانگ لگائی ہے، سمندر کنارے میں ہی چھلانگ لگانے کی وجہ سے سمندری موجوں نے تینوں کو سمندر کنارے لاکر ڈال دیا تھا۔
آج پیر صبح سمندر کنارے سے گذرنے والوں نے منکی پولس کو واقعے کی جانکاری دی اور اطلاع ملتے ہی پولس ٹیم جائے وقوع پر پہنچ گئی۔ خبر ملتے ہی بھٹکل ڈی وائی ایس پی ویلنٹائن ڈیسوزا سمیت ہوناور سرکل پولس انسپکٹر اور دیگر آفسران بھی جائے وقوع پر پہنچ کر جائزہ لیا بعد میں نعشوں کو منکی سرکاری اسپتال منتقل کیا گیا ۔
خاتون کی عمر لگ بھگ 30 سال اور لڑکیوں کی عمر آٹھ اور دس سال ہونے کا اندازہ لگایا گیا ہے۔
اس رپورٹ کے ساتھ فوٹوز شائع کئے جارہے ہیں، منکی پولس نے درخواست کی ہے کہ اگر کسی کو ان کے تعلق سے کوئی جانکاری ہوتو منکی پولس سے رابطہ کریں۔شناخت کے لئے منکی اسپتال پہنچ کر نعشوں کا معائنہ بھی کیا جاسکتا ہے۔
