منگلورو2/جنوری (ایس او نیوز) منگلورو قدیم بندر (اولڈ پورٹ) سے تعمیراتی ساز وسامان لے کر لکشدیپ کے لئے روانہ ہونے والا ’فیصل حسین‘ نامی بادبانی جہاز لکشدیپ کے کیلٹان جزیرے پر حادثے کا شکار ہوگیا۔

اطلاع  کے مطابق سامان سے لدا ہوا جہاز نصف سے زیادہ پانی میں غرق ہوگیااور وزنی سامان کی وجہ سے اس کو کنارے تک کھینچ لانا ممکن نہیں ہوسکا۔ لکشدیپ کے رہنے والے جہاز کے مالک جابر کو فوری طور پرحادثے کی اطلاع دی گئی جس کے بعدلکشدیپ سے ایک دوسرے جہاز کے ذریعے امدادی ٹیم پہنچ گئی اور نصف غرق شدہ جہاز کے 7رکنی عملے کو بچالیا گیا۔

 بتایاجاتا ہے کہ جہاز پر 700تھیلے سیمنٹ، 400اینٹوں کے بلاکس،1000تارکول کے تھیلے، مصنوعی ریت اور اسٹیل بڑی مقدار میں لدا ہواتھا۔ جسے جہاز سے نکالنا ممکن نہیں ہوسکا۔ اس وجہ سے لاکھوں مالیت کا   نقصان ہونے کا اندازہ لگایا گیا ہے۔بتایاجاتا ہے کہ جب جہاز کے اندر پانی گھسنے لگا تو وہ اس وقت اپنی منزل مقصود سے صرف چار گھنٹے کے فاصلے پر تھا۔