بھٹکل کے قریب شیرور سمندر میں بوٹ ڈوب گئی؛ کئی گھنٹوں تک پتہ نہ چلنے کے بعد دوسری بوٹ کے ذریعے ماہی گیر کنارے پہنچنے میں کامیاب
بھٹکل 22/مئی (ایس او نیوز) پڑوسی علاقہ شیرور (ضلع اُڈپی) سمندر میں ماہی گیری بوٹ ڈوب جانے سے ماہی گیر بُری طرح سمندر میں پھنس گئے تھے، مگر فوری طور پر دوسری بوٹ ان کی مدد کو پہنچ گئی اور پانچوں ماہی گیروں کو بچاکر کنارے لانے میں کامیاب ہوگئی۔ واردات اتوار شام قریب ساڑھے چار بجے کی ہے۔
ابتداء میں خبر آئی تھی کہ بوٹ ڈوبنے کے بعد پانچوں ماہی گیر لاپتہ ہوگئے ہیں اور کسی سے بھی رابطہ نہیں ہوپارہا ہے، مگر پھر رات قریب پاونے نو بجے پانچوں ماہی گیر دوسری بوٹ پر سوار ہوکر بحفاظت کنارے پہنچنے میں کامیاب ہوگئے تو لوگوں نے راحت کی سانس لی۔
ساحل آن لائن سے فون پر گفتگو کرتے ہوئے بوٹ مالک سڑکے مشتاق نے بتایا کہ وہ اپنے دیگر چار ساتھیوں اشرف، ابوبکر، شبیر اور حمید کے ساتھ آج اتوار صبح گیارہ بجے شیرور پورٹ سے ماہی گیری کےلئے نکلے تھے، ان کا ارادہ گہرے سمندر میں جاکر مچھلیوں کا شکار کرکے تین چار دن بعد لوٹنا تھا، مگر شام ساڑھے چار بجے کے قریب اچانک سمندری طوفان نے گھیر لیا اور سمندری لہریں اتنی زیادہ خطرناک ہوگئیں کہ ان کی بوٹ بُری طرح طوفان کی زد میں آگئی اور دیکھتے ہی دیکھتے بوٹ کے اندر پانی بھرنا شروع ہوگیا۔
مشتاق نے بتایا کہ ایک روز قبل یعنی سنیچر کو شیرور سے جناب جدہ عرفان کی بوٹ بھی ماہی گیری کےلئے گہرے سمندر میں گئی تھی، ہم نے فوراً عرفان صاحب کو وائرلیس کے ذریعے اپنے حالات سے آگاہ کیا اور مدد کی اپیل کی، ان کی بوٹ فوراً ہماری مدد کو آگئی اور ہم کو اپنی بوٹ پر سوار کرالیا۔ اس طرح ہم رات قریب پونے نو بجے شیرور سمندر کنارے پہنچنے میں کامیاب ہوگئے۔
مشتاق نے بتایا کہ ہماری بوٹ بیچ سمندر میں ہی ہے، پوری بوٹ ڈوب گئی ہے، قیمتی جال سمیت مچھلیوں کے شکار کے لئے استعمال ہونے والی دیگر چیزیں بھی بوٹ پر ہی ہم چھوڑ کر آئے ہیں۔ قریب دس لاکھ مالیت کا نقصان ہوا ہے۔