بھٹکل 19/جولائی (ایس او نیوز)  بھٹکل مسلم یوتھ فیڈریشن کی جانب سے   شہر کے غوثیہ اسٹریٹ میں  پانی کے یونٹ کا خوبصورت افتتاح  آل انڈیا پیام انسانیت فورم   کے جنرل سکریٹری  مولانا سید بلال عبد الحئ حسنی ندوی  کی دُعا کے ساتھ کیا گیا، جبکہ بھٹکل جماعت المسلمین  کے قاضی مولانا  اقبال مُلا ندوی نے   تالہ کھول کر یونٹ کا افتتاح کیا۔

اس موقع پر لکھنو سے تشریف فرما مولانا سید بلال عبد الحئ حسنی ندوی  نے  پینے کے پانی کا پلانٹ قائم کرنے پر نہایت خوشی کا اظہار کرتے ہوئے  اسے اسلام کی عملی شکل قرار دیا اور کہا کہ  پینے کا پانی فراہم کرنا بے حد مبارک کام ہے۔ انہوں نے اس بات کی خواہش ظاہر کی کہ انسانیت کی خدمت کرنے  کے ایسے نمونے جگہ جگہ سامنے آنے چاہئے۔ انہوں نے اس کام کو نہایت مبارک قرار دیتے ہوئے کہا کہ جو لوگ بھی ایسے کام کررہے ہیں اور جو ایسے کاموں  کے لئے تعاون فراہم   کرتے ہیں، سبھی  مبارکباد کے مستحق ہیں، انہوں نے تماموں کے لئے دعا فرمائی  اور مسلمانوں کو   ایسے کاموں میں بڑھ چڑھ کر  آگے آنے کی ترغیب دی۔

پروگرام کی صدارت کرتے ہوئے  بھٹکل مسلم یوتھ فیڈریشن کے صدر امتیاز اُدیاور نے بتایا کہ  آج پانی کے پہلے پلانٹ   کا افتتاح عمل میں آیا ہے جس کے لئے   بھٹکل مسلم جماعت منطقۃ  الشرقیہ   (سعودی عربیہ) نے تعاون فراہم کیا ، ایسے مزید  پانچ تا چھ جگہوں پر  پینے کے پانی کا پلانٹ قائم کرنے کا منصوبہ ہے جس سے نہ صرف مسلمان بلکہ غیر مسلم برادری کے لوگ بھی فائدہ اُٹھاسکیں۔ انہوں نے کہا کہ  غوثیہ اسٹریٹ میں قائم اس پہلے پلانٹ  سے قریبی علاقہ منڈلی ،  کرسچن کیری سمیت نستار کے عوام بھی  فائدہ اُٹھاسکیں گے  اور نہ صرف مسلم بلکہ غیر مسلم افراد بھی  یہاں سے پانی  لے جاسکیں گے۔ انہوں نے بتایا کہ  ایک روپئے کا کوئن  ڈالنے پر ایک لیٹر، دو روپئے کا کوئن ڈالنے پر پانچ لیٹر اور پانچ روپئے کاکوئن ڈالنے پر بیس لیٹر پانی  حاصل کیا جاسکے گا۔ انہوں نے کہا کہ  یہ چھوٹی سی رقم صرف پلانٹ کی   دیکھ ریکھ اور اس کی بحالی کے لئے  لی جارہی ہے۔ امتیاز اُدیاور نے بتایا کہ  اگلے  دس دنوں میں  مخدوم کالونی مین روڈ پر  بھی پلانٹ کی بنیاد  رکھنے  کا منصوبہ ہے، جبکہ مدینہ کالونی، آزاد نگر،  موگلی ہونڈا سمیت  دیگر علاقوں میں   بھی پلانٹ شروع کرنے کا منصوبہ ہے۔

پانی کے پلانٹ  کے افتتاح کے موقع پر  اپنے تاثرات پیش کرتے ہوئے قومی سماجی ادارہ مجلس اصلاح و تنظیم کے نائب صدر جناب عتیق الرحمن مُنیری نے  قوم وملت سمیت برادران وطن  کو پانی کی سہولت فراہم کرنے پر فیڈریشن کی خدمات کو بے حد  سراہا انہوں نے خواہش ظاہر کی کہ فیڈریشن کی جانب سے  پانچ اور چھ جگہوں پر ہی نہیں بلکہ شہر کے  ہر علاقوں میں اس طرح پینے کے صاف پانی کا پلانٹ قائم کیا جانا چاہئے ،  انہوں نے کہا کہ  شہر میں گرمیوں کے موسم میں پانی کی قلت کی جو صورتحال سامنے آئی تھی اسے دیکھتے ہوئے  جگہ جگہ پر ایسے پلانٹ قائم کرنے کی ضرورت ہے،ا س تعلق سے انہوں نے  تنظیم کی طرف سے  ہرممکن تعاون فراہم کرنے کا یقین دلایا۔  جناب عتیق الرحمن مُنیری نے  فیڈریشن کی خدمات  کو  آخرت میں نجات کا ذریعہ  قرار دیا اور اس طرح کی خدمات انجام د ینے والے نوجوانوں کے حق میں دُعا فرمائی۔

مرکزی خلیفہ جماعت المسلمین بھٹکل کے قاضی مولانا خواجہ معین الدین اکرمی مدنی، جامعہ اسلامیہ بھٹکل کے مہتمم  مولانا مقبول کوبٹے ندوی، نائب قاضی مولانا عبدالعظیم قاضیا ندوی،   مجلس اصلاح و تنظیم کے صدر جناب ایس ایم سید پرویز،   دبئی جماعت کے سابق جنرل سکریٹری جناب جیلانی محتشم،   انجمن سکریٹری جناب محسن شاہ بندری،   دیگر ذمہ داران جناب ایس جے ہاشم، جناب جیلانی شاہ بندری،  مولانا طلحہ رکن الدین ندوی، مولانا عبدالعلیم قاسمی،  میونسپل کونسلر جناب کے ایم اشفاق،  فیڈریشن کے جنرل سکریٹری محمد نصیف خلیفہ سمیت کافی دیگر ذمہ داران و  نوجوان موجود تھے۔