بنگلورو میٹرو پالیٹن ٹرانسپورٹ کارپوریشن (بی ایم ٹی سی) نے رات کی بس خدمات کا آغاز کردیا
بنگلورو،17؍نومبر(ایس او نیوز) گزشتہ تقریباً ڈیڑھ سال کے عرصہ کے بعد بنگلورو میٹرو پالیٹن ٹرانسپورٹ کارپوریشن (بی ایم ٹی سی) نے دیر رات بس سرویس کا آغاز کردیا ہے، جس سے رات کی شفٹ میں کام کرنے والوں کو آسانی ہوگی۔ اطلاع کے مطابق کووِڈ19- کے معاملات میں کمی اور رات کا کرفیو ہٹادئے جانے کے بعد رات کی شفٹ میں کام کرنے والوں کی تعداد میں اضافہ ہوا جس کے پیش نظر بی ایم ٹی سی بسوں کی رات کی سرویس شروع کرنے کا مطالبہ زور پکڑا۔ بی ایم ٹی سی ذرائع نے بتایاکہ چھوٹی اور درمیانی صنعتوں سے بھی یہ مطالبہ کیا گیا، جس کے تحت شہرکے مختلف علاقوں میں مانگ کے تحت رات 11بجے تا صبح5:30بجے بی ایم ٹی سی بسوں کی خدمات جاری رہیں گی۔ ذرائع نے بتایاکہ فی الوقت شہرا ور شہر کی مضافات کے مسافروں کو رات کی خدمات کو مد نظر رکھتے ہوئے کووِڈ ضوابط کے تحت اہم بس اسٹانڈوں سے مختلف علاقوں کے لئے کل 48 روٹس میں 70 بسوں کی سرویس شروع کی گئی ہے۔ اکثر بسیں کیمپے گوڈا بس اسٹانڈ سے نکلیں گی۔جب کہ یلہنکا، بنشنکری، یشونت پور، ٹی ٹی ایم سی، الیکٹرانک سٹی، گورگنٹے پالیہ، ہیبال سے بھی بسیں نکلیں گی۔ رات کے وقت بی ایم ٹی سی بس سرویس شروع کئے جانے کا اکثر مسافروں نے خیر مقدم کیا ہے لیکن مطالبہ کیا ہے کہ شہر کی مضافات میں میٹرو رابطہ سرویس بسوں کو بھی رات کے وقت بحال کیا جائے کیونکہ ان فیڈر بسوں کی سرویس رات 7بجے بند ہوجاتی ہے جس سے رات10تا11بجے سفر کرنے والے ریلوے مسافروں کو مشکلات کا سامنا ہے۔