18؍مئی سے بسیں چلانے بی ایم ٹی سی کی تیاری
بنگلورو، 17؍مئی (ایس او نیوز؍ پی ٹی آئی ) 18؍مئی سے بسیں چلانے کے لیے حکومت سے منظوری ملنے کی توقع کرتے ہوئے بنگلورو میٹرو پولیٹن ٹرانسپورٹ کارپوریشن (بی ایم ٹی سی ) نے ڈرائیورس اور کنڈکٹرس کو طبی جانچ کے لیے طلب کیا ۔
بی ایم ٹی سی کے ایک سینئر عہدیدار نے شناخت مخفی رکھنے کی شر ط پر کہا کہ ’’ہم 18 مئی سے خدمات کی بحالی کے لیے حکومت سے ہدایت کے منتظر ہیں، مگر احتیاطی قدم کے طورپر ہم نے اپنے درائیورس اور کنڈکٹرس کو ہفتہ کے دن ہی دیوٹی پر رجوع ہونے کو کہا۔ ‘‘ موجودہ لاک ڈاؤن 17؍ مئی تک ہے اور 18 ؍ مئی سے بسوں کے دوبارہ آغاز کا امکان ہے۔24؍ مارچ کو لاک ڈاؤن کے نفاذ کے بعد سے بس خدمات معطل کردی گئیں۔
بی ایم ٹی سی ذرائع کے مطابق تاحال کارپوریشن کو لاک ڈاؤن کی وجہ سے 250 کروڑ روپئے کا خسارہ ہوچکا ہے ۔ حکومت سے ہمیں ہدایت ملتے ہی ہم بسیں چلانے کا آغاز کردیں گے۔ ہم نے اپنے عملے کو ڈیوٹی پر حاضر ہونے کی ہدایت دی تا کہ طبی جانچ اور دیگر ضابطوں کی تکمیل کی جاسکے۔ اگرچیکہ حکومت نے 18؍ مئی سے بس خدمات کی بحالی کا ابھی تک اشار ہ نہیں دیا مگر بی ایم ٹی سی حکام نے اس کی تیاری شروع کردی ہے۔ ہفتہ کو بی ایم ٹی سی عملہ، طبی جانچ کروانے کینگیری بس اسٹانڈ پر جمع ہوا۔