سری نگر، 29؍جنوری (ایس او نیوز؍ایجنسی) سینئر کانگریس لیڈر جے رام رمیش کا کہنا ہے کہ بھارت جوڑو یاترا کا انتخابات سے کوئی تعلق نہیں ہے -انہوں نے کہا کہ یہ یاترا سیاسی جماعتوں کے درمیان گٹھ جوڑ کے متعلق بھی نہیں ہے -ان کا کہنا تھا کہ جموں وکشمیر میں ریاستی درجے کی بحالی اور جمہوری عمل کی بحالی فی الوقت ترجیحات ہیں -موصوف لیڈر نے ان باتوں کا اظہار ہفتے کو یہاں کانگریس ہیڈ کوارٹر پر منعقدہ ایک پریس کانفرنس سے خطاب کے دوران کیا-انہوں نے کہا کہ بھارت جوڑو یاترا کو انتخابات سے کوئی تعلق نہیں ہے اور نہ اس کا سیاسی جماعتوں کے درمیان گٹھ جوڑ کرنے سے کوئی واسطہ ہے -ان کا کہنا تھا کہ یہ سال2024کے انتخابات کیلئے ایک پلیٹ فارم بنانے کے متعلق بھی نہیں ہے -

مسٹر رمیش نے کہا کہ جموں وکشمیر میں سیاسی عمل کی بحالی اور ریاستی درجے کی بحالی فی الوقت ترجیحات میں ہے -انہوں نے کہا کہ کنیا کماری سے شروع ہونے والی اس یاترا نے 116دنوں میں 4ہزار80کلو میٹر کلو میٹرطے کئے -ان کا کہنا تھاکہ یہ یاترا کل136 دنوں پر محیط تھی جن میں 9دن دلی میں ٹھہراؤ تھا-کانگریس لیڈر نے کہا کہ روز22سے23کلو میٹر طے کئے جاتے تھے اور یہ یاترا ملک کے 75ضلعوں سے گذری-انہوں نے کہا کہ جموں وکشمیر میں یہ یاترا کل دس ضلعوں سے گذری جن میں پانچ ضلعے جموں کے اور پانچ ضلع کشمیر کے ہیں -

اس موقع پر جموں و کشمیر پردیش کانگریس کے صدر وقار رسول نے کہا کہ میں سمجھتا ہوں کہ ایک یاترا کے دوران جتنا راہل جی کا استقبال کیا گیا شاید کسی دوسرے لیڈر کا اتنا استقبال کیا گیا ہوگا-مسٹر رسول نے کہا کہ اس یاترا سے لوگوں کو ایک آواز ملی ہے اور لوگ اس آواز کے ساتھ جڑ گئے ہیں -انہوں نے کہا کہ جموں و کشمیر میں بے روزگاری اور مہنگائی کا طوفان ہے اور نفرت پر سیاست کرنے والوں کی دکانیں بند ہونے کا وقت آیا ہے -سکیورٹی انتظامات کے بارے میں انہوں نے کہا کہ سکیورٹی کے انتظامات کل کے مقابلے میں بہتر تھے -