بنگلورو،3؍مئی(ایس او نیوز)محکمہ بہبودی خواتین واطفال کے آئی سی ڈی ایس منصوبے کے تحت دی جانے والی شکر کی پاکٹوں پربی جے پی کے لیڈر پرادھیکارا کے صدر سی منی راجونے اپنے نام کا لیبل لگا کر بانٹنے کی کی کوشش کی ہے۔

رکن پارلیمان ڈی کے سریش نے یہ الزام لگایا ہے۔ وہ تعلقہ کے سرجاپور میں محکمہ خواتین واطفال سے تعلق رکھنے والے سپلمنٹری نیوٹریشن پروڈکشن یونٹ پر چھاپہ مار کر بات کر رہے تھے۔انہوں نے کہا کہ آنگن واڑی مرکز کے بچوں،زچاؤں، حاملہ عورتوں کو حکومت کی جانب سے دی جانے والی شکر کے پیکٹوں پر بی جے پی لیڈر سی منی راجو کا نام لگا کر غریب خاندانوں اور مزدوروں کو مفت تقسیم کرنے کی تیاریا ں کر کے حکومت کو دھوکہ دیا گیا ہے۔ ان کے خلاف فوراً مقدمہ دائر کرکے کارروائی کرنے کا انہوں نے مطالبہ کیا۔

انہوں نے کہا کہ ایڈی یورپا کو اقتدار سے اتارنے کے لئے بی جے پی کے لیڈر ہی ایسی شرمناک کارروائیوں میں ملوث ہو کر سازش رچا رہے ہیں۔ انہوں نے کہا کہ غریبوں کے کھانے میں نقب لگانے کی کارروائی کا رکن اسمبلی بی شیونا نے پتہ لگایا ہے۔کانگریس لیڈر وی ایس اگرپا نے بات کرتے ہوئے کہا کہ حکومت کی شکرکی پیکٹوں پر بی جے پی لیڈروں کے نام سے ری پیکنگ کر کے تقسیم کرنے کی کوشش کرنا شرمناک کارروائی ہے۔

انہوں نے مطالبہ کیا کہ وزیر اعلیٰ بی ایس ایڈی یورپا اور بہبودی خواتین واطفال کی وزیرششی کلا جولے اس کی راست ذمہ داری قبول کرتے ہوئے استعفیٰ دیں۔رکن اسمبلی بی شیونا نے با ت کرتے ہوئے کہا کہ بہبودی خواتین و اطفال محکمے کی سپلمنٹری نیوٹریشن پروڈکشن یونٹ آنگن واڑیوں کو غذائی اشیا فراہم کرتی ہے۔ لیکن اس یونٹ کی اسٹاک بک نہیں ہے۔ انہوں نے یہ کہتے ہوئے اپنے عدم اطمینان کا اظہار کیا کہ حکومت اقتدارکا غلط استعمال کرکے سیاست کر رہی ہے۔