ٹیپو سلطان کے یوم پیدائش کی تقریبات منسوخ،بی جے پی حکومت کا اقدام اقلیتوں کے خلاف ہے؛ سابق چیف منسٹر سدرامیا کاالزام
بنگلورو،30/جولائی (ایس او نیوز/ آئی این ایس انڈیا) کرناٹک کی بی جے پی حکومت کے موجودہ چیف منسٹر بی ایس یڈی یور اپا نے اپنی خدمات کا جائیزہ لینے کے فوری بعد منگل کے دن ریاست میں حضرت ٹیپو سلطان ؒ کے یوم پیدائش کی تقریبات منعقد کرنے پر پابندی عائد کردی ہے۔ جب کہ کرناٹک اسمبلی میں اپوزیشن جماعتوں کے لیڈرسابق چیف منسٹر سدرامیا کی کانگریسی حکومت کے دوران ریاست میں سال 2016سے حضرت ٹیپو سلطان کی یوم پیدائش تقریبات سرکاری سطح پر منعقد کی جارہی تھیں۔ سدرامیا حکومت کے دوران بھی ریاست میں ٹیپو سلطان کی یوم پیدائش تقریبات منانے کے خلاف احتجاجی مظاہرے منعقد ہوتے رہے تھے لیکن اسکے باوجود سدرامیا حکومت نے انگریزوں کے خلاف لڑتے ہوئے جام شہادت پی لینے والے حضرت ٹیپو سلطان کی یوم پیدائش تقریبات منانے کا سلسلہ جاری رکھا تھا۔ لیکن اب محکمہ کنڑا اینڈ کلچر کے جاری کردہ حکم نامہ کے مطابق حضرت ٹیپو سلطان ؒ کی یوم پیدائش کی تقریبات منسوخ کردی گئی ہیں۔ پیر کے دن سینئیر بی جے پی لیڈر اور سابق اسپیکر کے جی بوپیا نے چیف منسٹر یڈی یور اپا کو ایک مراسلہ روانہ کیا تھا جس میں ٹیپو جینتی تقریبات منسوخ کرنے پر زور دیا گیا تھا۔ انھوں نے وضاحت کی تھی کہ ضلع کوڈگو میں خصوصیت کے ساتھ ٹیپو جینتی منانے کے خلاف احتجاجی مظاہرے ہوئے تھے۔جس کے سبب خانگی اور سرکاری املاک کا نقصان پہنچا تھا۔ سابق چیف منسٹر سدرامیا نے اپنے صحافتی بیان میں کہا ہے کہ ٹیپو سلطان کی یوم پیدائش تقریبات منسوخ کرنے کا اقدام مخالف اقلیتی اقدام ہے اور یہ ایک قابل مذمت اقدام ہے۔ یہ بی جے پی کی اقلیتوں کی مخالفتئ کرنے والی آئیڈیالوجی کا ایک حصہ ہے۔انھوں نے کہا ہے کہ ٹیپو سلطان کو صرف اقلیتوں کا ہیرو سمجھنا نہایت غلط ہے۔ جب کہ انھوں نے برطانوی تسلط کے خلاف اپنی جان گنوادی اور اپنے دور اقتدار میں علاقہ میسور کی ترقی پر بھر پور توجہ دی۔