حکومت نے وزارت کا بنایا ہے مذاق ۔ قلمدان بدلنے کا کھیل جاری، سدھا کر کو میڈیکل ایجوکیشن واپس، مادھو سوامی اور آنند سنگھ کے قلمدانوں میں ادلا بدلی۔ آنند سنگھ مستعفی ہوسکتے ہیں
بنگلورو، 26؍ جنوری (ایس او نیوز) وزیر اعلیٰ بی ایس یڈیورپا نے دوبارہ دو وزراء کے قلمدان بدلے ہیں۔ بی جے پی کے سینئر رکن اسمبلی جے سی مادھو سوامی ، آنند سنگھ اور سی پی یوگیشور کے قلمدان دو بارہ بدلے گئے ہیں جبکہ وزیر صحت ڈاکٹر کے سدھا کر صحت کے ساتھ میڈیکل تعلم کا قلمدان واپس حاصل کرنے میں کامیاب رہے ۔ مادھو سوامی کو پہلے سیاحت اور محکمہ ماحولیات کے قلمدان دئے گئے تھے لیکن مستعفی ہوجانے کے اعلان کے بعد وزیر اعلیٰ بی ایس یڈیورپا نے اپنے قریبی وزیر سی پی یوگیشور سے بات کرکے ان کا قلمدان چھوٹی آبپاشی مادھو سوامی کو دے دیا۔ جبکہ سیاحت ماحولیات یوگیشور کو سونپنے کا فیصلہ کیا ہے۔ آنند سنگھ کو بنیادی ڈھانچوں کی ترقی کے ساتھ حج وقف کے قلمدان بھی دئے گئے ہیں۔ اچانک دیر رات ہوئی تبدیلی سے قبل دونوں وزراء نہیں دئے گئے قلمدانوں سے بالکل مطمئن نہیں تھے۔ دونوں وزراء مادھو سوامی اور آنند سنگھ نے وزارت سے مستعفی ہوجانے کی دھمکی بھی دے دی تھی۔ حالانکہ کابینہ میں حالیہ توسیع اور قلمدانوں کی تبدیلی سے ناراض وزراء کی ناراضی دور کرنے کے مقصد سے آج دوبارہ چند وزراء کے قلمدانوں میں تبدیلی کی گئی ۔
اس سے قبل پیر کے دن مادھو سوامی سے قانون امور پارلیمان جیسے طاقتور قلمدان چھین کر وزیر اعلیٰ نے میڈیکل تعلیم اور کنڑا اینڈ کلچر کے قلمدان دئے تھے۔ ان قلمدانوں سے وہ کافی ناراض تھے۔ 22؍ جنوری کو معمولی تبدیلی کرتے ہوئے مادھو سوامی سے کنڑا اینڈ کلچر واپس لے کر انہیں میڈیکل تعلیم کے ساتھ حج اینڈ وقف کا قلمدان دیا گیا تھا ۔ اس سے بھی وہ ناراض تھے ۔ آج انہیں وزارت سیاحت اور ماحولیات کے قلمدان دئے گئے تو ان کی ناراضی مزید بڑھ گئی تھی۔ 21؍ جنوری کو آنند سنگھ کو ٹورزم اور ماحولیات کے قلمدان دئے گئے تھے جبکہ جنگلات کا قلمدان ان سے واپس لے لیا گیا تھا۔آج انہیں دئے گئے قلمدان واپس لے کر بنیاد ڈھانچوں کی ترقی ،حج اور اوقاف دئے جانے پر بھی وہ ناراض ہیں۔
ذرائع کے مطابق آنند سنگھ انہیں دئے گئے قلمدانوں سے ناخوش ہیں۔ وزارت سے ان کے استعفیٰ دئے جانے کا بھی امکان ہے اور 26؍جنوری کو یوم جمہوریہ تقریب کے بعد وہ استعفیٰ کا فیصلہ کرسکتے ہیں حالانکہ ان کو منانے کی کوشش جاری ہے۔