بنگلورو، 12؍ستمبر (ایس او نیوز) سابق وزیر شریمنت پاٹل نے آپریشن کنول سے متعلق ایک دھماکہ خیز اطلاع دی ہے جس کے بعد سیاسی حلقوں میں ہلچل مچی ہوئی ہے۔انہوں نے بتایا کہ آپریشن کنول کے دوران بی جے پی لیڈروں نے انہیں بڑی رقم کی پیشکش کی تھی، یہ سچ ہے۔ حالانکہ بی جے پی کی جانب سے مجھے رقم دینے جو لوگ آئے تھے ان سے میں نے رقم نہیں لی۔ انہوں نے مجھ سے پوچھا تھا کہ آپ کوکتنی رقم چاہئے، بولو! ہم دینے کا انتظام کریں گے۔ لیکن میں بغیر رقم لئے ہی بی جے پی میں شامل ہوا تھا۔میں نے ان سے واضح کہا تھا کہ مجھے رقم نہیں چاہئے بلکہ بی جے پی حکومت تشکیل پانے کے بعد مجھے بھی جگہ ملنی چاہئے۔انہوں نے بتایا کہ میں نے رقم ٹھکرا کر نئی کابینہ میں شامل کرنے کی شرط رکھی تھی۔لیکن اب مجھے کابینہ میں شامل نہیں کیاگیا۔اس سلسلہ میں میں اپنے لیڈروں سے تبادلہ خیال کیا ہوں۔اگلی توسیع میں مجھے کابینہ میں شامل کرنے کا تیقن دیا گیا ہے۔شریمنت پاٹل نے بتایا کہ فی الحال ریاستی کابینہ میں توسیع نہیں ہورہی ہے۔جس وقت توسیع ہوگی مجھے امید ہے ضرور شامل کیا جائے گا۔