لکھنؤ،17 /نومبر(آئی این ایس انڈیا) بی جے پی کی رکن پارلیمان  ریتا بہگونا جوشی کی چھ سالہ پوتی منگل کی صبح اتر پردیش کے پریاگراج میں پٹاخے سے جلنے کی وجہ سے موت ہوگئی۔ معلومات کے مطابق پیر کو پٹاخوں سے مبینہ طور پر بچی جل گئی تھی۔ تقریبا 60 فیصد جلنے کے بعد انہیں پریاگراج کے ایک اسپتال میں داخل کرایا گیا تھا۔ ڈاکٹروں اور لواحقین نے اس بارے میں مزید معلومات دینے سے انکار کردیا۔ لواحقین نے معاملے میں رازداری برقرار رکھنے کی درخواست کی ہے۔

یوپی کے نائب وزیر اعلی کیشو پرساد موریہ نے کہا کہ بچی کو دہلی منتقل کرنے کا منصوبہ ہے۔ بچی کی موت پر غم کا اظہار کرتے ہوئے انہوں نے صحافیوں کو بتایا کہ بچی کھیل رہی ہوں گی اور مجھے بتایا گیا کہ اس دوران میں وہ جل گئی تھی۔ ہم اسے دہلی منتقل کرنے کا منصوبہ بنا رہے تھے لیکن ہمیں اس خبر کی توقع نہیں تھی۔ بچی کی موت کی خبر سے میں حیران رہ گیا۔ اگر لوگ محتاط رہیں تو پھر ایسے حادثات سے بچا جاسکتا ہے۔

واضح رہے کہ 71 سالہ ریتا بہوگنا جوشی نے 2016 میں کانگریس کو خیرباد کہہ کر بی جے پی میں شمولیت اختیار کی تھی۔ وہ سال 2007 سے 2012 تک یوپی پردیش کانگریس کی صدر تھیں۔ 2019 کے لوک سبھا انتخابات سے انہوں نے بی جے پی کے امیدوار کے طورپر یوپی کی پریاگراج سیٹ پر کامیابی حاصل کی تھی۔ ریتا بہوگنا جوشی یوپی کے سابق وزیر اعلیٰ ہیموتی نندن بہوگنا جوشی کی بیٹی ہیں۔